菊湖

菊湖（粵拼：guk1 wu4）係廣州地區舊時，三國時期到大宋年間出現嘅一個湖，位置喺而家大概二沙島北邊嘅珠江主航道附近。佢喺北宋初年入選過羊城八景，叫「菊湖雲影」。

名

由於三國時期起好個湖時係秋冬時節，加上湖邊四周圍生咗好多野生菊花，所以有「菊湖」呢個名。

史

三國時期，吳國刺史陸胤睇到廣州比較近大海，一到秋天出現海水倒灌，搞到珠江水有鹹味。結果陸胤嗌咗軍民喺白雲山鑿咗個濂泉，將水引到西南嘅上下二塘，流到越秀山東邊之後一分為二，其中右邊流去越溪（今日嘅東濠涌），左邊流到菊湖。起好個湖嗰時係秋冬時節。

大唐時期，廣州節度使盧鈞將菊湖整大咗，重嗌軍民起個壩，將白雲山嘅甘溪同東溪整埋一齊，流到菊湖入面。嘥士方面，大概西到中山紀念堂、東到黃華路，南到東風中路，北到越秀山南邊，面積大概4平方里（2km²），差唔多而家一個麓湖咁大。盧鈞起好菊湖之後重喺湖四周圍整咗跑馬車路，湖邊中咗好多木棉花、刺桐同好多花草樹木。

五代時期，廣州嘅南漢帝國君主劉龑喺菊湖邊起咗甘泉苑，重將個湖改名做流杯池。

消失

廣州喺北宋初年搞咗一次羊城八景評選，結果菊湖入咗圍。但花冇百日紅，到咗南宋因為天氣乾旱，白雲山啲泉水唔可以流到上下二塘，加上東溪啲水開始斷流，搞到菊湖開始乾涸。雖然個湖乾嗮，但喺之後好長時間入面，廣州啲人都重記得陸胤同盧鈞做出嘅功效而起咗先賢祠。重喺菊湖嘅舊堤岸邊起咗陸公亭同盧公亭。喺清初，著名學者屈大均先至將消失咗400幾年嘅菊湖搵返出嚟。喺大清同民國初年，啲人重可以睇到菊湖個影，連史料都提到佢。

民國初年，菊湖重凈低嘅兩個大遺址——撻子大魚塘同將軍大魚塘，喺1920年代俾廣州市政廳公務局填咗而完全消失嗮。但喺二沙島入面重見到帶有「菊湖」同「雲影」關鍵字嘅街名。

攷

• 菊湖——广州古代最大的人工湖 羊城晚报 （2010-07-04）
• 菊湖 广东百科信息网
• 羊城八景 之一菊湖：廣州古代最大的人工湖 北美新浪網 （2010-08-29）