國際音標

國際音標gwok3 zai3 jam1 biu1（英文：International Phonetic Alphabet），早年叫做萬國音標maan6 gwok3 jam1 biu1，通常用英文縮寫 IPA（粵拼：aai1 pi1 ei1）來代表，係一套語言學上，方便標示全世界每一種語音嘅標音符號。佢嘅特色係一個符號（或者叫做字母）祇代表一個語音或者音素，同時用附加符號來表示唔同環境之下嘅音變。噉樣，語言學家就可以用爾套系統來比較唔同語言嘅發音。佢係全球語言學家嘅共同標準。

國際音標

基本諗頭

喺現實世界，人往往會攞文字寫低自己講嘅嘢，但人平時生活用嘅文字同自然語言一樣，或多或少噉有啲混沌，例如

• 聲呢隻漢字喺廿一世紀初嘅廣東話入面可以有兩個音－聲sing1 或者 聲seng1；
• 而英格蘭話都係一樣，例如 cake（蛋糕）同 century（世紀）雖然頭嗰隻字母都係 c，但佢哋頭嗰個音查實幾唔同；

因為噉，語音學工作者就製定咗 IPA 呢套標準。IPA 最大特徵係極之精確，IPA 有一拃文字符號可以用嚟寫低講嘢嘅聲（標音），而且隻隻符號都淨係會對應一個音，同時每個音亦淨係得一個符號對應，仲會用 [] 嚟括住記嘅音（用意在於向睇嘅人強調返串符號係寫緊 IPA）。所以當研究語音學嘅人睇到一串 IPA 符號嗰陣，唔會有「吖，呢個符號有兩個可能嘅音喎，到底寫嘢嗰個人想表達嘅係呢個音定嗰個音？」噉嘅問題。

廣東話例子：

• 原句（掕住粵拼嘅漢字）：叉燒包好食caa1 siu1 baau1 hou2 sik6；
• 唔標調嘅 IPA：[tsʰaː siːu̯ paːu̯ hou̯ sɪk]

上面嘅例子用中括弧，表示用咗所謂嚴式標音，即係標語音而唔係標音素，所以係標 [tsʰ] 而唔係一般字典見到嘅 ts。

睇埋

• 粵語寬式國際音標

出面網頁

• 中文版本的國際音標表