葵青區

葵青區係香港地方行政區，裏面主要咨詢機構係葵青區議會，選舉代號係S，有28個分區。個區分成兩部份，葵涌同青衣，兩個部份都響新界。立法會選舉屬新界西。2006年為止，人口有52萬3300，佔香港人口百分之7.6，十八區排第四。葵青區人口密度係每平方千米有2萬2421人，係新界各區之中最高，遠超新界平均數3748人。

區內分界

葵青區同新界其他區唔同，唔係新界理民府分區走出來。1985年之前，葵涌同青衣都係歸荃灣區，之不過因為荃灣新市鎮發展，遠超一區之力，就響1985年4月1號將葵涌同青衣拆出來，另立葵涌及青衣區，同時亦選出相應嘅區議會。到咗1988年，就簡短啲，改叫葵青區。

區裏面世界知名嘅嘢有貨櫃碼頭，青馬大橋等建築。而百分之七十五嘅人都係住公屋。

行政

葵青區雖然係地方行政區，然而唔少政府部門會因應性質，各有各分法，所以葵青區只係選舉同民政事務處嘅分界。葵青區未大力發展之前，已經有唔少鄉落，葵涌嘅村係歸埋荃灣鄉事委員會，而青衣島係歸青衣鄉事委員會。葵青區嘅當然議員，但原居民代表，只有青衣鄉事委員會主席，因為荃灣鄉事委員會已經響荃灣區議會有當然議員。

分區

葵青區人口密集，2007年選舉分區有28個，順編號落。葵涌嘅由S01到S17，十七分區分別係葵興、葵盛東邨、上大窩口、下大窩口、葵涌邨、石蔭、安蔭、新石籬、石籬、大白田、葵芳、麗瑤、荔華、祖堯、興芳、荔景同葵盛西邨。青衣嘅由S18到S28，十一區分別係安灝、偉盈、青衣邨、翠怡、長青、長康、盛康、青衣南、長亨、青發同埋長安。

2007年區議會選舉，香港政府將葵青區南邊，荔華區嘅盈暉台地段劃歸深水埗區。

地理

葵青區響新界中南部，地近九龍，南便隔住維多利亞港對住香港島。北便同西便係荃灣區、東便係沙田區、東南便係深水埗區。西南海界接離島區，東南海界接油尖旺區同中西區。藍巴勒海峽將個區分成兩部份，東便係葵涌，響新界大陸上便，西便係青衣島，同大陸分開。葵青區因為係荃灣區分拆出來，係荃灣新市鎮一部份，所以區內冇核心地帶，比較似樣嘅聚腳點，葵涌一便係港鐵葵芳站一帶，青衣則係港鐵青衣站一帶。

交通

• 港鐵
  • 荃灣綫：葵興站、葵芳站
  • 荃灣綫、東涌綫：荔景站
  • 東涌綫、機場快綫：青衣站
• 青馬大橋

參攷

• 〈葵青區議會〉。
• 〈葵青區議會〉。