蓬萊閬苑係香港新界大埔區一間大型道觀，喺大埔區南部嘅碗窰鄉半山洲。供奉呂祖為主神，當地人叫佢做「呂祖廟」。
蓬萊閬苑喺1960年代中起，創辦人叫二姑，起初喺深水埗設壇城，之後買入咗半山洲山坡地，開始起閬苑，用嚟清修，長年累月，慢慢修建而成。閬苑依山而起，其地方又叫鳳凰山，入口嘅牌坊亦都寫住「鳳凰山」，園景佈局考究，小橋流水，好有古樸嘅味道。主殿供奉呂祖畫像，題款係甲午年（1954年），殿前面分別供奉八仙同觀音彩畫，主殿之後有兩層殿宇，樓下係「關帝廳」，二樓設有「龍鳳殿」，供奉玉帝、龍母同觀音諸神。
每逢農曆正月初九嘅玉皇誕、四月十四呂祖誕同八月初八嘅八仙誕等，唔少善信都會去到蓬萊閬苑參拜。
