資訊超負荷

資訊超負荷（粵拼：zi1 seon3 ciu1 fu6 ho6；英文：information overload），又或者叫資訊過多，係指手上嘅資訊多得滯，搞到個人唔知應該點樣做決定好。廿一世紀初畀好多人指係資訊爆炸嘅事代：隨住資訊科技愈嚟愈先進，要搜集資訊愈嚟愈易，一個人喺 Google 搜尋器入面是但打幾隻字，就已經會搵到大量相關嘅料，啲料多到佢根本睇唔嗮。因此，資訊超負荷成為咗一種頗受關注嘅問題。

一個人望住大拃寫咗字（字包含資訊）嘅紙仔，一時之間根本處理唔到啲紙仔上面嘅字講嘅內容－事實表明，接收到嘅資訊嘅量大得滯嗰時，會搞到個人覺得混亂。

概論

睇埋：決策、資訊、資訊爆炸同決策疲勞

要做決策，個人梗要或多或少噉搜集一啲資訊，例如商業上要決定「邊隻產品值得抌本做研發」，通常起碼要睇吓市場研究嘅結果，睇吓啲客對啲產品有咩意見；又例如想像行軍打仗（或者打射擊遊戲）嗰時，一位軍人要決定「要行邊條路線前往目標地點」，通常起碼會想知一條路線有冇敵軍活動嘅跡象；呢啲資訊會對佢哋嘅決策結果有具體影響－如果一間公司嘅管理層對市場形勢判斷錯誤，可以搞到間公司因為開發錯產品而損失慘重。

心理學同腦神經學等領域上嘅研究表明，人腦嘅資訊處理能力係有限嘅，當一個人腦要處理嘅資訊嘅量大得滯（資訊過多），往往會搞到個人唔舒服，而且實驗性質嘅研究仲發現，當要處理嘅資訊嘅量大到咁上下，個人做準確判斷嘅能力會下跌。因為噉，資訊過多同資訊爆炸等嘅課題响決策相關討論上廣受關注。

應對

内文：大數據同機械學習

為咗應對「手上有大拃資訊」嘅問題，2010 年代嘅 IT 界興起咗大數據（big data）相關嘅領域。大數據泛指一啲「因為大得滯複雜得滯，廿世紀同打前嗰啲數據處理方法搞唔掂」嘅數據集。處理噉嘅數據會用到機械學習同第啲 AI 技術，呢啲技術重點係要將啲數據簡化：例如想像做市場研究，搵到拃數據返嚟，數據集包含咗描述 50,000 位消費者嘅數據，不過咁大拃數據，決策者難以一嘢理解拃數據畀到啲乜資訊，於是佢就行統計分析，將班消費者分做 5 個「類別」，每類內部差異細而類之間差異大，再描述每個類別有咩特徵－即係例如「第一類主要（75%）係 18 至 24 歲嘅後生仔女，同埋興响禮拜六日行街買嘢、第二類...」呀噉。

有關「點樣用 AI 相關技術應付大數據」嘅問題，仲可以睇吓統計分類同降維等嘅課題。

亦可以睇吓地圖學點樣用總描技巧嚟確保地圖唔會顯示太多資訊。

睇埋

• 分析癱瘓
• 複雜系統
• 人機互動
• Cyberpunk