贛粵運河(贛字讀「禁」,粵拼gam3 jyut6 wan6 ho4)係條規劃緊嘅運河,呢條運河係計劃從北邊嘅鄱陽湖口嘅九江度開始,一直向南行,去到廣州東莞同深圳之間嘅珠江出海口嗰邊。

贛粵運河嘅線路圖

行過嘅地方 編輯

依家呢條運河喺度規劃緊,呢度講嘅係規劃嘅方案:

編輯

 
贛江-鄱陽湖-長江嘅位置圖
  • 716年張九齡唐玄宗提交咗一份方案,話要起條路過大庾嶺,結果就通過咗呢份方案。之後起梅關驛道,成爲1000幾年嚟溝通長江水系同埋珠江水系嘅陸路。
  • 到咗明朝嗰陣,出身吉水(依家係江西省吉安市吉水縣)嘅大學士解縉,佢係提出開鑿粵贛運河嘅第一人,當時佢想攞贛江北江嘅水嚟灌溉農田。後嚟呢份方案提出咗之後,政府就派咗啲小人過去大庾嶺嗰邊去勘測下附近嘅環境,之後就開始規劃贛粵運河。份方案寫掂咗之後就建議朝廷,先開贛江呢邊,方便解決吉水嘅乾旱問題。
  • 1960年,中華人民共和國國家交通部、長江流域規劃辦公室、廣東省航運廳江西省交通廳一齊做咗下粵贛運河嘅經濟、路線調查,就喺第年,佢哋就提出咗運河嘅初步規劃方案。不過由於嗰陣時屬於困難時期,規劃完咗之後好耐都未開工。
  • 喺20世紀80年代初,江西交通部門整咗同贛粵運河有關嘅未來規劃方案。就喺嗰陣時,中國交通部開始研究粵贛運河方案,1983年完成份計劃,當時討論係先起贛粵運河定先起湘桂運河,最後取消湘桂運河計劃。
  • 2002年,中華人民共和國政協委員、交通部海事局副局長劉德洪就喺中國內地嘅「兩會」入面提出咗「開通贛粵運河、奠定富民之基」呢份提案。
  • 2005年4月江西省贛州市就發佈咗份《贛州市人民政府關於加快水運事業發展的實施意見》,而呢份嘢就話:2010年之前先將贛州嘅水路(從贛州港一直到贛縣小良口嗰橛),從之前嘅五級航道升到三級航道。
  • 2008年後半年,贛江嘅石虎塘航電樞紐工程正式開工,而呢個水壩係有三級通航能力,成千噸嘅船都可以從南昌一直去到泰和嗰邊嘅。
  • 2009年8月25號,國家交通運輸部珠江航務局就向國務院提出,要改下中國嘅七大江河流域規劃,其中改咗後嘅珠江流域航運規劃已經向國務院報批。
  • 2009年9月份中旬,峽江水利樞紐工程正式開工。而呢個工程係利用咗泰和水利樞紐工程萬安水電站嚟保證成千噸嘅船可以從南昌開始,一直成功去到贛州嗰邊。
  • 到咗2010年,贛粵運河嘅規劃已經搞掂,而萬安電站嗰邊啱好爭取到對茅江附近樞紐嘅投資,重提高咗貢江嘅航道等級,等於推動咗粵贛運河嘅進程。

拗數 編輯

編輯

如估呢條運河起好嘅話,長三角珠三角嘅距離可以減少1200公里,噉從長江中游去珠三角嘅船就唔使兜到東海臺灣海峽再到南海喇。因為佢直接連通咗長江珠江兩大水系,可以貫通起江南地區嘅南北走向水路工程。噉珠三角地區啲嘢可以通過運河直接送到去華中,甚至再運京杭運河直通華北地區。中國社會科學研究院經濟研究所嘅所長麻智輝就講咗,如估凈係喺經濟嚟講,呢條運河嘅開通,對於廣東同江西嚟講係利大過弊,其中有利嘅地方就有好多。喺交通方面嚟講,相比陸路鐵路空運,水運可以降低啲成本。呢條運河兼有旅遊價值,有利運河週邊縣市嘅經濟發展。

編輯

 
鄱陽湖嘅衛星圖

大江網嗰邊就開咗份「開贛粵運河,好定唔好?」嘅民意調查,結果就得出咗噉嘅結果:有48.71%嘅網民話「起咗條運河之後對江西嚟講完全係唔掂」,有29.03%嘅網民就話「起咗條運河之後對江西嚟講,係掂嘅。」,重有19.68%嘅網民就話「起呢條運河嘅前提係要起咗贛粵高速鐵路先」[1]

有人話,喺贛粵運河開通咗之後會搞到江西入面嘅河流水位下降,結果江西嘅學術界、包括官員都反對。佢重專程去到鄱陽湖嘅生態經濟區嗰邊睇咗下啲水源,發現係外流嘅。而鄱陽湖嘅流域覆蓋咗江西省96%嘅地區,有6條河流都係流入鄱陽湖入面。如估開通運河嘅話,會搞到流入鄱陽湖嘅河流越嚟越少,降低咗鄱陽湖嘅儲水量[2]

重有人話,贛粵運河開通咗之後會污染咗鄱陽湖,而呢個係江西嘅生態優勢。鄱陽湖係條全封閉嘅水系,即使係長江出現嚴重污染嗰陣,都唔會去到鄱陽湖入面,因為長江嘅源頭都唔喺江西度。起呢條運河就會令資源出境,就生態保護而言,可能冇乜人上心嚟保護佢[3]

有人認爲,贛粵運河根本唔關珠江航運事,廣東省呢頭力主起呢條河,其實係想「南水北調」,令江西成為廣東飲用水嘅免費來源,而「贛粵南水北調工程」簡直係送啲水嚟廣東嘅水廠度[4]。而依家嘅生態補償機制都唔健全,到時江西嘅利益會好受損,比如話爲咗保障供水畀廣東、香港嘅東江水質清淨,江西呢頭要將上游嘅廠關曬,香港有畀錢廣東啊,但開頭幾十年廣東一個鑌都無畀江西,直到江西抗議,先畀噉啲江西[5]

另外,江西規劃經濟時,偏重發展北邊,而開挖條贛粵運河簡直係嘥時間同埋嘥錢。[6]

雙方嘅態度 編輯

 
珠江嘅出海口

江西 編輯

贛州同埋吉安都有人提出要整贛粵運河,此外重有做全國人大代表嘅民營企業家胡淑華提出嘅「起贛粵運河、形成中國東西邊嘅水路交通網絡」。佢重響人大十屆三次會議入面講過,而吉安嘅代表團符紅桃同埋11位代表都聯合提出「起贛粵運河嚟提升江西嘅地位優勢」嘅議案。

廣東 編輯

廣東方面就好讚成嚟起條運河。根據廣東省發改委嘅人話:廣東嘅航道部門都接觸過江西省嘅航道部門,佢重考察過江西省嘅規劃河段。此外啲地方政府對呢份提案好積極,而韶關市政府就專門開咗個研討會嚟討論下關於開通贛粵運河嘅事,重請咗贛州嘅航務管理分局負責人嚟參加呢次會議。喺2009年嘅廣東「兩會」嗰陣,廣東省政協委員李晉鋒就提交咗份議案,就係話唔該有關部門快啲搞掂北江上游到江西九江嘅運河開鑿考察。而廣東省交通廳就話,贛粵運河係關係到長江水系同珠江水系嘅重大工程,佢唔單止規模比較大,重有跨省、水資源、河流生態等呢啲敏感問題,佢哋重會建議由珠江流域管理機構向中國交通運輸部、水利部提請研究工作。

編輯

  1. 網易網
  2. 環球網
  3. 中央日報[失咗效嘅鏈]
  4. 中國水運網[失咗效嘅鏈]
  5. . 原著喺2010年3月6號歸檔. 喺2014年5月2號搵到.
  6. MSN新聞[失咗效嘅鏈]

連出去 編輯