赤門
赤門（英文Chek Mun）又叫赤門海峽（英文Chek Mun Hoi Hap）或者吐露海峽（英文Tolo Channel），係香港一海門。赤門喺船灣淡水湖東南同西貢半島西北之間。海門東北駁去大赤門，西南入大埔海，西北入船灣海，而東北出大鵬灣。
地理
編輯赤門一帶，岩石奇特，北係沉積岩，南係火成岩。查實成個赤門，係一條斷層，係全港最明顯嘅斷，東南向西北咁走，所以南北地質各異。未有海水之前，水流沖刷成谷，後海平面上昇，變成海門。
呢帶岩石喺香港來講，係好古老。而赤門之所以叫赤門，皆佢北岸石頭含鐵而紅，因以爲名。
赤門都幾長，南北兩岸似平行線。北岸北西向東計，起點白沙頭同上面三門墪，跟住東頭洲，跟住長牌墪、三門山、鵝髻頂到鳳凰笏頂。過啲重有白角山、昂莊山。再過啲就係大赤門嘅大嶺，去到𡰪係黃竹角嘴。而南岸有烏龜沙嘴、三杯酒，跟住有內海企嶺下海，過海係石茅頭，隔灣係白角仔，過荔枝莊個灣，到鵝頸嘴，再直去到響螺角就係海下灣，灣外海括然開朗，有塔門，有赤洲，就係大赤門。