維基百科

越南民族

越南民族狀況介紹
(由越南人跳轉過嚟)

越南民族（粵拼：jyut6 naam4 man4 zuk6；越南文：dân tộc Việt Nam／民族越南）係指生活喺越南領土上嘅各個民族，按國籍講，可以稱爲越南人（jyut6 naam4 jan4；người Việt Nam／𠊛越南），簡稱越人（người Việt／𠊛越）[註 1]。

呢版有越南文嘅喃字，部分作業系統、網頁瀏覽器需要特殊字母或符號嘅支援先睇到，否則可能出現亂碼、問號、空格等其它符號。
越南文化
系列文章
順化古城
順化古城
越南文化介紹

越南地方文化
   西北文化
   東北文化
   北部平原
   中北部文化
   中南部文化
   西原文化
   東南部文化
   西南部文化
改

越南係個多民族國家，現時越南政府認證嘅民族有54個，外加一組「外國人」[1]。最大嘅民族係京族，又稱爲越族，「越南人」呢個詞除咗表示國籍越南嘅人外，民族層面上多指京族人[註 2]。京族作爲主體民族，佔越南總人口嘅85.7%（2014年）[2]。不過京族內部有族群對立，由於越南曾經分裂爲南北兩個政權，北部同南部嘅京族人有唔同嘅歷史背景[註 3]，直到而家，南北兩地嘅京人重係有政治、經濟上嘅對立意識，呢種地域矛盾對越南政治影響深遠。除咗呢個主體民族，越南有好多個少數民族，呢啲少數民族有佢哋自身嘅語言、文化，其中占族比較特別，因爲佢哋歷史上有自己嘅獨立國，但後來畀越南征服吞併，占族亦都吸收成爲越南民族。京族、占族、華族、高棉族住喺越南平原地帶，稱爲平地人，而更多嘅少數民族住喺山區，稱爲山地人，近來越南爲咗解決平原地方人口密集問題，亦爲咗促進山區發展，當局鼓勵平地人移居山區，試圖民族融合，但平地人同山地人有別嘅觀念未變到[4]。呢啲山地民族比較細，未建立過自己嘅國家。

據1999年嘅越南人口調查，京族（越族）佔86.2%，齊族佔1.9%，芒族佔1.5%，下高棉人（高棉族）佔1.4%，華族佔1.1%，儂族佔1.1%，苗族佔1%，其他民族佔4.1%。

越南民族一覽（按人口佔比排）

編輯
  1. 京族（京 Kinh；又叫越族）86.2%
  2. 齊族（齊 Tày，舊名：土族；分佈喺北部越南，講台語系統嘅語言，人口達150萬人，係少數民族中人口最多嘅。曾任越南共產黨總書記嘅農德孟就係齊族出身）1.9%
  3. 泰族（泰 Thái；泰人係泰國嘅多數種族）1.7%
  4. 芒族（𡙧 Mường[註 4]；同京族最有血緣關係，芒話亦係同越南話最有關係嘅語種，越南話屬越芒語支）1.5%
  5. 高棉族（Khmer[註 5]；高棉人係柬埔寨嘅多數民族）1.4%
  6. 華族（華 Hoa；亦即在越華僑。大部分係出身中國南部嘅移民）1.1%
  7. 儂族（儂 Nùng）1.1%
  8. 苗族（H'Mông[註 6]；同中國苗族係同系種族）1%
  9. 瑤族（猺 Dao[註 7]；又叫勉族，使用嘅語言同苗族有語言上嘅關係）
  10. 嘉淶族（嘉淶 Gia Rai）
  11. 埃帝族（𠲖帝 Ê Đê[註 8]）
  12. 巴那族（巴那 Ba Na、Bahnar[註 9]）
  13. 山齋族（振齋 Sán Chay[註 9]）
  14. 占族（占 Chăm；越南南部歷史上存在嘅占婆王國嘅後裔）
  15. 疏登族（疏登 Xơ-đăng[註 9]）
  16. 山瑤族（振遙 Sán Dìu[註 10]；講中文嘅，但同華族（華僑）有別個嘅分類）
  17. 占黎族（Hrê[註 11]）
  18. 基呼族（基呼 Cơ Ho[註 9]）
  19. 拉格黎族（Ra Glai[註 12]）
  20. 唔儂族（M'Nông[註 13]）
  21. 土族（土 Thổ[註 14]；同京族係近緣種族）
  22. 斯丁族（Xtiêng[註 12]）
  23. 克木族（Khơ Mú)[註 15]）
  24. 雲喬族（Bru - Vân Kiều[註 16]）
  25. 寨族（Giáy[註 12]）
  26. 基修族（基修 Cơ Tu[註 9]）
  27. 綵貞族（綵𡎞 Giẻ Triêng[註 17]）
  28. 斜偎族（斜偎 Tà Ôi[註 9]）
  29. 麻族（ Mạ[註 18]）
  30. 孤族（孤 Co[註 9]）
  31. 加由族（加由 Chơ Ro[註 9]）
  32. 哈尼族（何貳 Hà Nhì[註 19]）
  33. 生門族（𦎡椚 Xinh Mun[註 20]）
  34. 朱歟族（朱歟 Chu Ru[註 9]）
  35. 寮族（牢 Lào[註 21]；寮人係老撾嘅多數民族）
  36. 拉基族（羅志 La Chí[註 22]）
  37. 芙蘿族（芙蘿 Phù Lá[註 9]）
  38. 拉祜族（羅詡 La Hủ[註 23]）
  39. 抗族（抗 Kháng）
  40. 傣仂族（濾 Lự[註 24]）
  41. 巴天族（Pà Thẻn[註 25]）
  42. 彝族（盧盧 Lô Lô[註 26]；同中國雲南居住嘅彝族係同系）
  43. 哲族（Chứt[註 12]；同京族有近緣血統，人口唔過兩千到四千人）
  44. 莽族（莽 Mảng）
  45. 仡佬族（旗勞 Cờ Lao[註 27]）
  46. 布依族（布依 Bố Y[註 28]）
  47. 羅呵族（羅呵 La Ha[註 9]）
  48. 貢族（貢 Cống）
  49. 𠊎族（𣈜 Ngái[註 29]；講中文嘅，但同居住喺都市嘅華族（華僑）有別個嘅分類）
  50. 蚩羅族（蚩羅 Si La[註 9]）
  51. 普標族（Pu Péo[註 30]）
  52. 布婁族（Brâu[註 31]）
  53. 也曼族（Rơ Măm[註 12]）
  54. 於都族（於都 Ơ Đu[註 9]）

註

編輯
  1. ↑ 越南舊名「安南」，可以將呢個舊名替換「越南」來組詞，不過安南呢個名而家唔常用。
  2. ↑ 越南有唐人，唐人係越南政府承認嘅少數民族，話一個唐人係越南人，係話佢國籍屬越南，但論及文化，重係認爲佢係唐人。
  3. ↑ 越南嘅南北分裂唔浄止近代河內政權同西貢政權嘅對立，重有更早嘅時候，譬喻鄭阮紛爭。越南嘅領土擴張係向南嘅，稱爲南進，導致而家越南版圖沿岸綫S形噉。越南南部原本有獨立國，後來畀越南吞併。呢啲吞併嘅地方唔同於紅河平原（京族嘅源地），所以越南經歷過地域重整，但南方對北方嘅唔認同甚至抗拒遺留至今[3]。入邊有好多嘅歷史因素，詳參越南史。
  4. ↑ 芒字拆自喃字嘅聲符。
  5. ↑ 高棉族係柬埔寨嘅主體民族，喺越南有分佈。越南文中，高棉人稱爲Khmer，讀爲Khơ-me，無對應嘅漢喃文。
  6. ↑ H'Mông呢個名無對應漢喃文，不過後面嘅「Mông」可以寫成「蒙」。呢個名係苗人自稱，中文譯爲「赫蒙」，不過中文更習慣稱呼做「苗」。苗族係東南亞跨國民族，H'Mông係跨國名，各國有本國嘅土名。喺越南，佢哋稱爲貓 Mèo，呢個漢喃係記音，唔表意，發音類似於中文嘅「苗」（類似粵拼音：meu4）。
  7. ↑ 瑤人畀歷代統治者驅除、歧視，所以佢哋名用嘅字唔係幾好聽（主要在於偏旁）。中國爲咗民族平等，改字爲「瑤」，越南由於直接廢除漢字，淨係寫音唔表意，無呢個問題。漢喃用字可參考喃遺產保存會嘅在綫辭書[5]。
  8. ↑ 埃帝族自稱Anak Ê Đê，縮自Anak A.Ê - D.I.Ê，意思係上帝子民，佢哋同信回敎嘅占族有密切關係。而Ê Đê轉音自Rang Đê。第一字係擬聲，第二字可以配爲「帝」。
  9. ↑ 9.00 9.01 9.02 9.03 9.04 9.05 9.06 9.07 9.08 9.09 9.10 9.11 9.12 漢喃只係記音，唔表意，所以有多種寫法。
  10. ↑ 山瑤係自稱，Sán Dìu係記音，所以對應嘅漢喃寫法好多。佢哋講土白話（粵語一支），曾經以爲係瑤人。
  11. ↑ 無對應漢喃文。不過rê可以寫成黎。喺越南佢哋有個名叫做占黎 Chăm Rê。
  12. ↑ 12.0 12.1 12.2 12.3 12.4 無對應嘅漢喃文。中文直接用音譯。
  13. ↑ 無對應嘅漢喃文。不過Nông可以寫成「農」「儂」等。佢哋又有名做農 Nong（記音）、𥮉𤼸 Bu-dâng（記音）。中文用音譯。
  14. ↑ 有三個土族，不過之間無任何聯繫。中國嘅土族係阿爾泰語系嘅民族，越南嘅土族係南亞語系嘅民族，另外齊族稱爲土族。
  15. ↑ 第一音無對應漢喃，第二音寫成𩹮。克木族係個跨國民族，中國亦有，但未畀政府認證。
  16. ↑ 第一音無對應漢喃，後兩個音可以寫成雲喬（記音）。越南本身又叫佢哋做𠊛雲喬 người Vân Kiều。
  17. ↑ 第一音有好多個漢喃可以寫。粵文譯音揀嘅係接近越南文發音嘅「綵」字；而粵文譯音嘅「貞」拆自第二音嘅喃字嘅聲符。
  18. ↑ 呢個漢喃係記音嘅。粵文名係攞呢隻喃字嘅聲符。
  19. ↑ 哈尼人係個跨國民族，中國亦有。漢喃字係記音。
  20. ↑ 粵文譯文用字拆自兩隻喃字嘅聲符。
  21. ↑ 寮族係老撾嘅主體民族，喺越南有分佈。越南嘅漢文典籍將老撾嗌做「哀牢」。老撾重有個名叫做「寮國」，簡稱「寮」。
  22. ↑ 拉基族喺中國有分佈，但未畀政府認證，而劃咗入彝族。漢喃文係記音。
  23. ↑ 拉祜族喺中國有分佈，而且畀政府認證咗。漢喃文係記音。
  24. ↑ 傣仂族喺中國有分佈，屬於傣族分支。漢喃文係記音
  25. ↑ 無對應嘅漢喃。巴天族喺中國有分佈，但未畀政府認證，劃咗入瑤族。
  26. ↑ 彝族喺中國有分佈，而且畀政府認證咗。漢喃文係記音，中國方面記音做「倮倮」。
  27. ↑ 仡佬族喺中國有分佈，而且畀政府認證咗。漢喃文係記音。
  28. ↑ 布依族喺中國有分佈，而且畀政府認證咗。
  29. ↑ 𠊎族其實係客家人，越南將佢哋從唐人中分出成少數民族。漢喃係記音，呢個音其實係客家話經常講嘅「𠊎」（客家字，字形：亻厓），即係「我」噉解。
  30. ↑ 普標人喺中國有分佈，但未畀政府認證，而劃咗入彝族。無對應嘅漢喃。
  31. ↑ 無對應嘅漢喃，但râu可以寫成喃字𩯁。粵文用音譯，第二隻字拆自對應喃字嘅聲符。

攷

編輯
  1. ↑ 據1979年3月2號越南統計總局第421項決定。
  2. ↑ "The world factbook - Vietnam". CIA. 2014年6月20號. 原著喺2020年5月17號歸檔. 喺2015年4月8號搵到.
  3. ↑ 日本大寶石出版社。〈越南百科：越南人的身份認同〉. 《走遍全球：越南》。中國旅遊出版社。頁 423頁。ISBN 978-7-5032-4627-2。
  4. ↑ 日本大寶石出版社。〈越南百科：多民族國家越南〉. 《走遍全球：越南》。中國旅遊出版社。頁 425頁。ISBN 978-7-5032-4627-2。
  5. ↑ "Nôm Lookup Tool". 原著喺2015年4月19號歸檔. 喺2015年4月8號搵到.
由「https://zh-yue.wikipedia.org/w/index.php?title=越南民族&oldid=2121938」收