選舉委員會 (香港)
唔好同選舉管理委員會 (香港)搞亂。
選舉委員會，係負責選出香港行政長官、部分香港立法會議員嘅組織，第一、二屆就有八百人，第三、四、五屆有一千二百人，第六屆有一千五百人。
第一、二屆（1998、2000年）嘅選委會選舉，由於特首嘅任期未完，所以只係負責選出立法會嘅選舉委員會界別嗰10席、6席。
按人大提出嘅831決定，第五屆香港行政長官嘅產生辦法改動嗰陣，選舉委員會會過渡成提名委員會，人數、構成同產生辦法都要同第四屆一樣，不過由於香港2017年政改方案响泛民主派反對之下通過唔成，選舉委員會維持原狀，直到2021年，中共中央為咗喺香港實行所謂「愛國者治港」，兜過香港本地嘅政改程序，大幅改動選舉制度，其中選舉委員會嘅部分，人數增加至1,500人，選民數目、投票選出嘅委員都大縮水，反而當然委員同埋由團體提名嘅委員相應增加，呢個改動直接違反咗由中共自己提出嚟嘅831決定，引起泛民主派、西方世界一致負評。
殖民地時期嘅「選舉委員會」 改
1994年，當時嘅立法局通過咗由彭定康推行嘅香港1994年政改方案（不過，末代港督嘅政改方案係未經北京當局諮詢或同意而強行實施，被稱為三違反方案）。
喺1995年第4屆香港立法局選舉方面，有10席由選舉委員會選出，當時嘅選舉委員會係由全部嘅區議員組成，同香港主權移交後嘅選舉委員會完全唔同。
