長沙灣

長沙灣（粵拼：coeng4 saa1 waan1*4；英文：Cheung Sha Wan），係香港新九龍嘅一個地方，西面係荔枝角，東南面係深水埗，北面全部係山。長沙灣原本一個長形嘅海灣，家下就填海填成一塊大地方。裏面無論工業，商業同住宅都有。住宅有公屋、唐樓、洋樓、私人屋苑。工業有唔同工廠大廈，亦都有船廠。商業以衫褲批發為主，寫字樓方便就唔係咁多，多數係工廠大廈轉成。長沙灣有唔同食品嘅批發市場，供應全香港。所以，長沙灣可以話係包羅萬有嘅社區。

長沙灣中部一景

長沙灣對出就係昂船洲，家下已經連成一體。

史

因為發現左李鄭屋東漢墓，所以歷史學家例如蕭國健，判斷東漢嗰陣時呢度已經有人住。

舒懋官編嘅重修新安縣志（清代嘉慶二十四年刊行），裏面就有提到長沙灣係一條村，係『官富司管屬村庄』，又另一節又有提係『官富司管屬客籍村庄』，所以可能係本地人同客家人都有嘅村，曾經係鄧氏地。長沙灣原本係一個大海灣，係漁民聚居地。原海灣西起海角荔枝角，東接另一個海角深水埗，海邊散住唔少村。家下同荔枝角分界喺蝴蝶谷道。經過好多次填海，長沙灣已經見唔到海灣，村落亦都消失。取而代之係舊樓，公共屋村，工廠大廈等。原本海岸綫約莫喺家下青山道。

地方

長沙灣近青山道一帶，主要係舊式嘅私人樓，同埋幾過大型公共屋邨，好似蘇屋邨、李鄭屋邨。而長沙灣道，一帶，西面係工廠區同長沙灣廣場，中間係公共屋邨元州邨，麗閣邨，而東面係已經拆咗嘅工廠大廈。再出荔枝角道，西面係新私人屋苑，中間係批發市場。

街道

呢區主要街道有長沙灣道、青山道、元州街、荔枝角道、東京街、興華街、福榮街、福華街、祥發街、保安道同順寧道等等。

交通

呢頭交通都幾方便下，有港鐵荃灣綫經過長沙灣道地底，設有長沙灣站同埋荔枝角站（「荔枝角站」唔係真正嘅荔枝角，其實仲係長沙灣工業區）。而長沙灣填海區個頭就有南昌站，嗰個站可以搭港鐵西鐵綫同埋東涌綫。