長沙灣道
長沙灣道（Cheung Sha Wan Road；灣讀環）係香港新九龍一路， 起自旺角太子尾，貫通深水埗、長沙灣，去到荔枝角。道東南駁彌敦道，西北駁葵涌道，約莫3.3千米。長沙灣道因為起得闊，替咗青山道個位，做咗旺角到荔枝角嘅要道。另外，全條馬路地底，都係港鐵荃灣綫。
長沙灣道深水埗一帶，開咗唔少成衣同疋頭鋪頭，主要係批發，亦有零售，尤其係欽州街到黃竹街一段，係香港同類鋪一頭集中地，有時裝街同成衣街之稱。
史 編輯
長沙灣道喺1920年代初開，由於當時條街去到長沙灣海邊為止，所以叫1923年9月28號憲報公布做長沙灣道[1]。條路分開幾段來起，並唔係順住咁起。
各段 編輯
長沙灣道係雙程路，每邊有兩到三綫（有幾段可達四綫），由旺角伸到去荔枝角。
旺角段 編輯
長沙灣道旺角段，東南起自彌敦道、大埔道同界限街交界，係旺角北部[2]。未有發展之前，呢段喺塘尾到田寮一帶。過塘尾就係最舊嘅深水埗市區，以黃竹街為界[3]。所以呢段係深水埗同旺角交界之地。
呢段有條天橋，可以畀車由長沙灣道黃竹街同楓樹街之間，駛到去界限街洗衣街路口附近[2]。
長沙灣道，黃竹街同楓樹街之間，南邊係楓樹街遊樂場，有波地畀人踢波，遠啲場邊係深水埗街坊福利會會址。
深水埗段 編輯
長沙灣道深水埗一段，黃竹街去到欽州街，佢西南便係深水埗最舊嘅市區[3]。最舊區邊界喺鴨寮街，而長沙灣道就同佢平行，隔個街口。所以呢段長沙灣道來講，市區西南係舊過東北。
呢段主要路口有南昌街，欽州街，過欽州街就入長沙灣，入填地。舊底南昌街有明渠，長沙灣道有短橋過渠，家下條渠經已係暗渠，完全冚密。深水埗地鐵站喺南昌街同欽州街之間地底。
呢帶開咗唔少成衣同疋頭鋪頭，主要做批發，亦有做零售，係香港同類鋪頭集中地，有時裝街同成衣街之稱。
長沙灣段 編輯
長沙灣道長沙灣段，佔全條馬路至大部份，由欽州街去到甘泉街。條路係曲尺形，喺長沙灣郵政局度屈咗一屈。
成條路都喺原長沙灣個海灘，對出海灣嘅填地上便。因為填海遲過深水埗同荔枝角，呢段好遲先起。最初係深水埗營盤，喺欽州街到東沙島街之間，即係今日長沙灣政府合署、怡靜苑同怡閣苑。過咗營盤，1950年代初都係海。1950年代中，光昌街到甘泉街一段起好，長沙灣道係斷開兩截。去到1960年代初，先至打通。長沙灣道去到甘泉街邊，經已係條明渠，由蝴蝶谷流落來，後尾封咗變暗渠。
由欽州街到長沙灣郵政局近光昌街一段直路，主要有長沙灣政府合署、麗閣邨、九龍工業學校、長沙灣遊樂場、長沙灣消防局、元州邨、深水埗運動場、長沙灣體育館，成段多數係公屋同公共設施，有少數私人樓。長沙灣地鐵站響東京街同發祥街之間嘅地底。
郵局到甘泉街一段直路，見長沙灣郵政局、深水埗運動場、長沙灣廣場，呢段主要係工廠大廈，主要係同衫有關，到咗今時今日好多變咗寫字樓同貨倉，唔少做時裝批發。荔枝角地鐵站響大南西街到通州西街之間嘅地底。
荔枝角段 編輯
長沙灣道荔枝角一帶，好早經已填咗海，作軍事用途[4]。之不過，當時唔叫做長沙灣道，只有青山道同荔枝角道。後尾呢帶連轉咗做荔枝角煤倉同美孚油倉。今日長沙灣道同葵涌道、荔枝角道、青山道平排呢佈局，係1960年代尾到1970年代頭嘅事。
長沙灣道近荔枝角，係荔枝角交匯處，呢處同甘泉街、長順街、蝴蝶谷道同埋荔枝角道交界。蝴蝶谷道路到美荔道一段，係條單程路，只有去旺角方向。反方向嘅車，就行同佢平排嘅荔枝角道。佢道中間夾住葵涌道天橋。而近交匯處，可以畀車轉入青山道入葵涌。
長沙灣道最盡，伸到去荔枝角美荔道，差唔多去到美孚新邨第六期。荔枝角大橋落橋去美孚嘅車，可以橫過美荔道直入長沙灣道。葵涌道天橋底，有路畀車由荔枝角道入長沙灣道。美荔道南行亦可轉入長沙灣道。
呢段路因為夾喺青山道同葵涌道中間好窄嘅位，並無乜特別建築。靠青山道嗰邊對住石牆，青山道喺佢上便，過青山道就係荔枝角醫院同荔枝角收押所。而另一邊，過葵涌道天橋同荔枝角道，係美孚新邨第四期、九龍巴士廠兼總部、荔枝角消防局。因為部份九龍巴士廠變咗住宅曼克頓山，有條行人天橋起緊，橫過荔枝角道、葵涌道、長沙灣道，經石牆打上，到長沙灣道近美荔道巴士站。
地鐵 編輯
長沙灣道地底係地下鐵路，係港鐵荃灣綫來回兩管隧道。條綫其中三個站都喺長沙灣道底下，分別喺深水埗嘅深水埗站，喺長沙灣遊樂場側邊嘅長沙灣站，同埋長沙灣廣場側邊嘅荔枝角站。
起呢段嗰陣，成條長沙灣道都掘開咗，搞到塞車。