等時粵拼dang2 si4英文isochrony)係語言學上嘅一個概念,可以話係相當於語言節奏

有語言學研究試過觀察唔同語言音節特性,發現唔同語言喺「音節之間嘅時間間隔」嘅變異數上有差異,即係話有啲語言音節之間嘅時間間隔比較固定,有啲語言音節之間嘅時間間隔有時好長有啲好短。因為噉,有語言學家喺 1980 年代提出咗等時嘅概念,指語言會好似有節奏噉,「每隔一段固定長度嘅時間就有某啲嘢發生」。

語言分類 編輯

語言可以按「邊啲嘢等時」嚟分類,而佢哋按呢套將語言分做三大類[1][2]

  • 有啲語言係所謂嘅音節定時語言(syllable-timed),意思即係話呢啲語言嘅音節之間會成有節奏嘅關係,音節之間嘅時間間隔大致上傾向固定[註 1],呢啲語言俾人話佢哋講起嘢上嚟好似「開緊機關槍」噉,例如法國話西班牙話意大利話廣東話就俾語言學家分類做音節定時語言;
  • 又有啲語言係所謂嘅重音定時語言(stress-timed),意思即係話呢啲語言嗰啲重音(即係例如大聲啲嘅音節)之間嘅時間間隔傾向固定,但音節之間嘅時間間隔比較唔固定,俾人話講起嘢上嚟好似「打緊摩斯密碼」噉,英格蘭話俄羅斯話阿拉伯話就俾語言學家分類做重音定時語言;
  • 除此之外,世上仲有所謂嘅音拍定時語言(mora-timed),意思即係話呢啲語言嗰啲音拍(mora;指隻語言嘅拍子,跨語言共通、最短嘅時間單位)之間嘅時間間隔固定,例如日本話古希臘話就俾語言學家分類做音拍定時語言。

不過要留意嘅係,等時呢個概念喺廿一世紀初都仲係有一定嘅爭議性。

註釋 編輯

  1. 自然語言呢家嘢往往冇乜定死咗嘅規則,所以呢個分類講嘅只係「呢隻呢隻語言『傾向』音節定時」。

睇埋 編輯

引述 編輯

  1. Nespor, M., Shukla, M., & Mehler, J. (2011). Stress‐timed vs. syllable‐timed languages (PDF). The Blackwell companion to phonology, 1-13.
  2. Roach, P. (1982). On the distinction between 'stress-timed' and 'syllable-timed' languages (PDF). Linguistic controversies, 73, 79.