香港泛民主派－民政事務總署矛盾爭議

香港民主派－民政事務總署矛盾爭議，係指2020年起，好多泛民主派區議員都表示佢哋嘅地區工作遭受民政事務總署（簡稱民政署）打壓，或者喺唔同問題，被民政署刻意矮化。

背景

喺2019年，香港陷入逃犯條例修訂草案風波，去到6月更加出現近200萬人上街反對嘅局面。親中陣營由於一直支持修訂，所以喺同年嘅香港區議會選舉入面，選情受到極大困擾，最終泛民主派取得大勝，取得全港86%嘅直選議席（388席）同埋17個區議會嘅主導權。

爭議事例

雙方嘅爭議涉及撥款被拖延，會議室安排，武漢肺炎口罩派發安排，民政事務專員指控區議員越權，拒絕提供秘書支援，公職人員喺會議期間離場等。而被指越權嘅議題除咗警察執法嘅行動外，仲包括唔少民生事項，例如最低工資檢討、明日大嶼等。有議員批評，民政事務總署嘅安排對落選親中陣營有偏幫之嫌。

區議會會議室爭議

喺2020年2月，政府因應武漢肺炎暫停開會兩星期，灣仔區議會另覓場地開會，但民政事務署事後拒絕發還租用場地嘅租金。灣仔區議會主席楊雪盈入稟小額錢債審裁署追討，並表示《區議會條例》無列明會議要喺區議會會議室舉行。

2020年11月，沙田民政事務署喺未有同區議會商量嘅情況之下，將沙田區議會會議室變做「民政署會議室」。沙田政府合署大樓嘅水牌，本來印上「沙田區議會會議室」嘅部分亦被遮蓋。沙田區議會主席程張迎話嗰個會議室喺2002年起已稱為「沙田區議會會議室」，設計亦係為區議會開會而設，黃文萱批評呢個做法係矮化區議會，蔑視民意代表。劉穎匡喺社交媒體提及呢件事，批評政府擅自改名係極其幼稚嘅宣示主權行為。沙田區政表示，呢個舉動係「妄自竄改」，要求交代咩人做呢個決定。

武肺疫症期間爭議

武肺疫症期間，有好多泛民主派區議員都想做一啲地區防疫工作，但都分別同當區地區民政署出現爭議，甚至有非政府組織想幫區議會購買口罩，都畀民政專員以該組織綜合大樓嘅申請作為籌碼，『勸喻』佢哋諗清楚。

喺2020年12月，民政署曾經發表聲明，話民政署同區議會嘅合作關係被惡意渲染，聲稱無意圖打壓區議會，全力支援地區抗疫撥款嘅申請。去到19號，18區泛民主派聯絡會議召開記者會，批評署方聲明多署嚴重失實、避重就輕，意圖誤導公眾。沙田區議會副主席黃學禮話，佢哋嗰區冇議員收過民政署嘅口罩，自己仲收到署方嘅信件，表明拒絕支援區議會購買口罩，因為市面已有供應，政府亦有派發。黃學禮批評，署方政治掛帥、拒絕合作，為打壓區議會連防疫同埋市民嘅安全都唔理。離島區議員梁國豪亦批評，民政署將口罩率先分發畀親政府組織，同埋由落選親中派組成嘅分區委員會，質疑政府係要誤導市民區議會唔做民生工作。東區區議會副主席趙家賢就指責，政府只容許官府派發防疫物資，但係唔准區議會舉行防疫活動。另外，黃偉賢，楊雪盈亦指，就連佢哋會議議程傾要買口罩，只係民生議題，都被政府用唔同方式阻撓。