馬來人至上

馬來人至上（又叫做馬來人主權，爪夷文：کتوانن ملايو；馬來話：Ketuanan Melayu）係一種種族主義，認為馬來人（巫來由人）係馬來西亞或者馬來亞嘅主人或者係特權者（tuan）。馬來西亞華人同馬來西亞籍印度人構成馬來西亞嘅重要少數種族，被認為係受過馬來人嘅恩惠，通過承認馬來西亞憲法第153條規定馬來人可以得到優待，而獲得公民權。呢種交換通常叫做馬來西亞社會契約。馬來人至上概念成日畀政治野心家，尤係影響力較大嘅巫來由人統一組織（簡稱巫統，或作馬來民族統一機構）所提及。

雖然呢個觀念喺馬來亞獨立之前已經存在，但係呢個名詞喺2000年代初期之前並未流行。歷史上，對於呢個觀念最強力嘅反對聲浪係嚟自非馬來人為首嘅政黨，例如民主行動黨，激烈反對種族主義觀念；2000年代，多種族嘅人民公正黨亦反對馬來人至上觀念，轉而提倡「人民至上」（ketuanan rakyat）。馬來人至上觀念喺1940年代開始受到注目，馬來人組織因將剝削馬來統治者嘅政治權力而抗議馬來亞聯邦成立，之後又為爭取馬來亞獨立而戰。1963年至1965年參組馬來西亞嘅新加坡，喺人民行動黨領導之下亦挑戰呢一個觀念，引發1964年新加坡種族騷亂。最後，時任首相東姑阿都拉曼為咗避免局勢惡化為由，喺1965年8月7號下令將新加坡州由馬來西亞聯邦中除名。新加坡獨立之後改由人民行動黨繼續掌握政權。

1969年5月13號嘅五一三事件之後，馬來西亞憲法中有關馬來人至上嘅部分（實際只列明馬來人特殊地位）得到確立，成為剛性條款，期間馬來極端民族主義亦有發展，佢哋宣揚建立一個由巫統一黨執政嘅政府，並強調只有馬來人先至係真正嘅馬來西亞人。1970年代，馬來西亞政府開始推行只有利於馬來人嘅新經濟政策。國家文化政策亦強迫非馬來人融入到馬來族群。直至1990年代，時任馬來西亞首相馬哈迪開始推行馬來西亞民族（Bangsa Malaysia）政策，強調馬來西亞人並唔係馬來人嘅認同。但喺2000年代，政治野心家開始宣揚馬來人至上觀念，並公開譴責嗰啲質疑馬來西亞社會契約嘅政府官員。「Ketuanan Melayu」」呢個詞去到21世紀初期，先成為流行馬來語。

睇埋

• 馬來西亞土著