高扁
高扁（粵拼：gou1 bin2 / 英文：goblin），普通話音譯哥布林，係西歐一種傳說生物，喺廿世紀起嘅奇幻作品當中都成日出現，佢哋嘅形象通常係光頭、細粒又鍾意整古做怪。對高扁嘅描述可以分做兩大種－中世紀後同埋廿世紀起。
古代傳說
編輯
喺廿世紀前，高扁常見於英格蘭、蘇格蘭同愛爾蘭等地嘅民間傳說。當中英文係起碼喺 14 世紀（中世紀後期）嗰陣有咗 goblin 呢隻字嘅[1]。
據講喺呢段時期，高扁嘅形象有啲似仙子（fairy）：民間傳說通常將高扁描述成「鍾意惡作劇，有陣時會有惡意想害人」；根據呢啲傳說，高扁有陣時會寄居喺人類屋企，得閒嗰陣仲可能會（例如）敲打廚房裏面啲廚具製造噪音、或者喺屋主瞓覺嗰時郁啲傢俬呀噉－總括嚟講就係做好多小動作，為屋主帶嚟麻煩；部份嘅傳說會畀父母攞嚟教細路－呢啲傳說會話「高扁專門整蠱曳嘅細路，但會送禮物畀乖同聽話嘅細路」[2]。
紅帽精
編輯出嗮名鍾意殺人嘅紅帽精（redcap）有陣時會畀人當係高扁嘅一種[3]。
相傳紅帽精係種極危險嘅仙子或者高扁：根據傳說，紅帽精會喺英蘇邊界嗰頭啲城堡度活動，畀人描述為得人驚嘅怪獸－據講紅帽精啲牙好長、手指又幼又尖、對眼好大而且火紅噉色、頭上戴住頂紅色嘅帽；紅帽精頂帽之所以紅色係有原因嘅－據講，一隻紅帽精對任何闖入佢嘅地頭嘅人類都係一律殺無赦，殺完人就會將自己頂帽浸喺受害人嘅血度，令頂帽愈嚟愈紅，紅帽精體形唔高大但好捱得打，無論人類點樣用拳腳或者武器毆一隻紅帽精，佢都唔會受傷[4]，而對付佢哋嘅唯一方法據講係用十字架等嘅神聖物品，用呢啲神聖物品嘅神力消滅充滿邪力嘅紅帽精[5]。
現代奇幻
編輯
自從廿世紀起，高扁就成日出現喺奇幻故仔當中。喺呢啲作品當中，高扁嘅形象同古時嘅（非紅帽精）高扁好相似－高扁通常畀呢啲作品描繪成身材細粒（成年高扁身高通常似得幾歲嘅人類細路）、尖耳、光頭又醜樣、詭計多端、而且成日惡作劇或者偷嘢；佢哋有可能但唔一定識用魔法[6]。
《魔戒》、《龍與地下城》、《魔法風雲會》同埋《哈利波特》等大受歡迎嘅廿世紀奇幻作品都有提到高扁，唔同作品都各自對高扁嘅形象作出創新－例如《哈利波特》將高扁族描繪成「有文明、聰明、仲識營運魔法銀行」，而《魔法風雲會》就將高扁族描繪成「有些少智能、有可能識魔法、但傻吓傻吓成日做埋嗮啲蠢事」噉嘅樣[7]。
出名作品
編輯以下呢啲奇幻作品都有提到高扁：
... 呀噉。
睇埋
編輯文獻
編輯- （英文） Froud, Brian (1996). The Goblin Companion. Atlanta: Turner.
引咗
編輯- ↑ Goblin. Online Etymology Dictionary.
- ↑ Goblin. Encyclopedia Britannica.
- ↑ The Redcap Goblin of Caerlaverock Castle. Kelpies.
- ↑ Briggs, Katharine (1976). An Encyclopedia of Fairies. Pantheon Books. p. 339.
- ↑ Henderson, William (1879). Folklore of the Northern Counties of England and the Borders (2nd ed.) W. Satchell, Peyton & Co. p. 253.
- ↑ Froud, Brian (1996). The Goblin Companion. Atlanta: Turner.
- ↑ A GUIDE TO GOBLINS 互聯網檔案館嘅歸檔，歸檔日期2022-09-20.. Magic: the Gathering.
拎
編輯
- （英文） Goblin，不列顛百科全書講高扁相關傳說。
- （英文） Our Goblins Are Different，電視橋段網呢頁講高扁橋段。