龍與地下城
《龍與地下城》（粵拼：lung4 jyu5 dei6 haa6 sing4 | 英文：Dungeons & Dragons，D&D；個簡稱 D&D 通常讀粵拼：di1 en6 di1）係美國TSR出嘅一個奇幻檯上 RPG 系列，1974年出頭一代作品，2014年出第五代。
流程 編輯
以下係 D&D 嘅基本玩法流程[1]。
事前準備 編輯
一場 D&D 遊戲會有：
第一次玩嘅玩家通常要做角色創建，定立自己嘅角色有乜特性－玩家坐底要決定自己創立嗰個角色屬於邊種種族（有矮人、精靈同人類等嘅選項）、係咩職業同埋能力值分佈呀噉，呢啲特性會對「有啲乜嘢行動係個角色可以採取嘅」有深遠影響。啱啱開始玩、乜都唔識嘅玩家成日會攞啲預先由其他人設好咗嘅角色嚟玩，玩到咁上下先試吓創立自己嘅角色[1]。
遊戲進行 編輯
參與冒險嘅玩家攞住自己嘅角色（好多時用塑膠公仔嚟表示）同埋第啲隻遊戲要用嘅架生（好似係 20 面嘅骰仔呀噉），就可以開始「冒險」。一場冒險啱啱開始嗰陣，GM 會攞住佢手上啲素材，描述場冒險嘅背景，當中啲素材通常係由出版隻遊戲間公司整嘅，但亦可以係由 GM 自創。會好似噉：
- GM：你哋係一班冒險家，有日你哋嚟到一座出嗮名有魔法嘅森林，座森林裏面住滿嗮各種嘅仙子同異獸。有傳言話，近排魔法森林深處有股黑暗力量喺度作怪，搞到有股令啲嘢腐敗嘅力量慢慢噉周圍散佈。你哋而家想進入呢座森林，解開呢個謎團[2]。
或者
- GM：你哋係一班冒險家，有日你哋嚟到呢條叫巴羅維亞（Barovia）嘅村仔度。你哋撞到兩個細路，一對好細個嘅姐弟。兩個細路開口要求，想你哋幫佢哋趕走佢哋屋企地牢入面嘅一隻『怪獸』。你哋諗都唔諗就應承幫佢哋解難，但你哋一行入間屋度，就發覺自己出唔返去... [3]:"Death House"
隨住遊戲進行，玩家要輪流用把口描述自己個角色採取咩行動。正常嚟講，GM 會跟規則決定「啲行動有乜結果」（RPG 系統）。玩家採取行動嗰時，要擲骰仔，跟住 GM 就會睇住骰仔擲到嘅數、角色嘅能力值同埋遊戲規則，判定行動嘅結果，即係好似噉[1]：
- GM：你哋嚟到鎮上面嘅
tavern ，搵到你哋嘅目標人物阿蟲。你哋行埋去，問阿蟲有冇見過你哋搵緊嗰個疑犯，阿蟲唔睬你哋。 - 玩家 A：我兇神惡煞噉行埋阿蟲度，我凶佢話我係縣官嘅死黨，佢唔出聲就係同縣官過唔去。我諗住靠噉樣做嚟嚇到佢開聲。（望住手上張紙記低咗嗰個反映「凶人嘅能力」嘅能力值，然後擲粒 20 面骰）我擲到嘅數值係 18。
- GM：（按照能力值、骰仔擲到嘅數同遊戲素材嘅內容）阿蟲真係畀尼古拉斯（玩家 A 嘅角色個名）凶到，於是就爆料，話佢喺三日前見過嗰個疑犯，話個疑犯似乎打算去鎮以北嗰座陵墓度，想要搵某件畀人收埋咗喺陵墓入面嘅法寶... [註 1][4]
或者噉：
- GM：你哋嚟到大橋前面，正當你哋想過橋嗰陣，有個守衛企出嚟攔住你哋，話想過橋就要交 5 個金幣做過路費。你哋打算點做？
- 玩家 A：（睇睇手上張紙記住嗰個表示「銀包有幾多錢淨」嘅數值，夠錢）我乖乖哋交過路費。
- 玩家 B：（睇睇手上張紙記住嗰個表示「銀包有幾多錢淨」嘅數值，夠錢但唔想交）我揀嘗試趁啲守衛冇望住嗰時靜靜雞祟過。（望住手上張紙記低咗嗰個反映「做鬼祟嘢嘅能力」嘅能力值[5]，然後擲粒 20 面骰）我擲到嘅數值係 14。
- GM：（按照能力值、骰仔擲到嘅數同遊戲素材嘅內容）尼古拉斯（玩家 A 嘅角色個名）交咗過路費過橋，過咗之後，佢見到阿積（玩家 B 角色個名），原來阿積喺尼古拉斯交過路費嗰陣神不知鬼不覺噉祟咗過嚟。
又或者噉[6]：
- GM：你哋繼續進行調查，行入呢間有魔法嘅圖書館，正當你哋檢查緊啲書有冇你哋想搵嘅線索嗰陣，書架上啲書突然間一嘢飛嗮出嚟，仲結合埋成一隻大怪獸噉嘅形狀，攻擊你哋！你哋畀隻書怪獸突襲，避唔避得開佢嘅攻擊呢？離隻怪獸最近嗰兩位玩家，唔該擲骰。
- 玩家 A：（擲粒 20 面骰）我擲到嘅數值係 17。
- 玩家 B：（都係擲粒 20 面骰）我擲到 4。
- GM：（按能力值、骰仔擲到嘅數同遊戲素材嘅內容）尼古拉斯（玩家 A 角色個名）一跳避開隻書怪獸嘅攻擊，但阿積（玩家 B 角色個名）就唔好彩畀隻書怪獸一嘢捉住。阿積完全郁唔到（即係乜行動都採取唔到），阿積嘅一眾隊友，你哋打算點做？
場冒險進行到咁上下，情節仲有可能提到戰鬥，而啲玩家可以會用棋盤等嘅架生，模擬情節提到嘅戰鬥。基本做法通常都係一樣：GM 提供情境，玩家決定同講自己角色嘅行動，當中玩家好多時要郁手用擲骰等嘅方法產生隨機性，然後 GM 按遊戲規則決定「啲行動有乜結果」[7]。
當場冒險結束嗰時，GM 就會按規則決定「每位玩家得到啲乜」，例如係「啲角色攞到幾多經驗值」噉。
角色 編輯
|
睇埋 編輯
註釋 編輯
攷 編輯
- ↑ 1.0 1.1 1.2 "Narrative" or "Tabletop" RPG's.
- ↑ D&D: Need An Adventure In A Hurry? Here Are 60 One-Page Adventures.
- ↑ Best Intro Adventures For D&D 5e, Ranked. The Gamer.
- ↑ On Being a (Game) Master Storyteller. The Angry GM.
- ↑ D&D 5E – Stealth and Hiding. Dungeon Master Assistance.
- ↑ Candlekeep Mysteries - The Joy of Extradimensional Spaces. D&D Adventures.
- ↑ Chapter 9: Combat. D&D Beyond.