齊綫數字

齊綫數字（英文：lining figures），又叫現代體數字（modern figures），喺印刷同平面設計，係指一種形態上類似大楷羅馬字母嘅阿剌伯數字，同古風體數字相對；係阿剌伯數字傳入歐洲之後有嘅兩種形式之一，喺19世紀開始喺印刷業出現，係中文排版最常用嘅數字。

齊綫數字，成組數字嘅頂部同底部都對齊

一個同時用兩種數字嘅表，標題用齊綫數字，內文用古風體

早期嘅齊綫數字，大隻過例如 c 或者 e 嘅細楷字母，但係又細隻過大楷字母

所謂齊綫，係指成組數字嘅頂部同底部都對齊兩條概念上嘅綫；設計上，齊綫數字係整到大細同整體灰度都同大楷字母協調，即係原則上應該係主要筆劃喺基綫（baseline）同大寫頂綫（cap height）之間。但係有個別字款嘅齊綫數字會頂部對齊上升筆劃綫（ascender line），變相soeng3同大楷唔協調。

大楷標題用齊綫數字可以令成個標題喺視覺上有一致感，分類廣告亦通通常係用齊綫數字。但係如果係內文，用嘅又係常見嘅對齊大寫頂綫或者對齊上升筆劃綫嘅款式，內容又係英文，用佢就可能會畀人有數字重要過文字嘅感覺；不過基於數字應該同隔籬內容協調嘅原則，因為中文冇分大細楷，排中文應該用齊綫數字。

現代齊線數字嘅前身係一種喺18世紀中出現嘅手寫商業用數字，頂部對齊，但係又冇大楷咁高，爾種數字喺1788年首先喺英國被造成字粒，19世紀整字粒嘅廠商再改到同大楷一樣高，即係而今gaa1一般用嘅齊綫數字。

喺電腦排版，如果用嘅係 OpenType 嘅數碼字款，而個字款又有齊齊綫同古風體兩種數字字形，揀用齊綫數字可以用 ｢lnum｣ 參數，喺 CSS 亦可以喺 font-feature-settings 用同一個參數，而排版軟件就通常會喺用家介面有個選項畀你㨂用邊種數字。