2013/14年度香港甲組足球聯賽

2013/14年度香港甲組足球聯賽係第102屆香港甲組足球聯賽。第一場比賽喺2013年8月30號舉行。呢屆聯賽冇升降班，而呢季之後嘅頂級聯賽亦計劃由香港超級聯賽取代。

球隊同埋比賽球場

呢屆聯賽有12隊球隊參加，包括上季甲組前９名同埋上季乙組前３名：

球隊	球場	地區	容量
標準流浪	深水埗運動場	深水埗	2,194
公民	青衣運動場	青衣	1,500
東方沙龍	城門谷運動場 旺角大球場 深水埗運動場	荃灣 旺角 深水埗	5,000 6,680 2,194
愉園	小西灣運動場 大埔運動場 九龍灣公園	小西灣 大埔 九龍灣	11,891 3,000 1,200
天行元朗	元朗大球場	元朗	4,932
傑志	旺角大球場	旺角	6,680
皇室南區	香港仔運動場 旺角大球場	香港仔 旺角	4,000 6,680
南華	香港大球場 旺角大球場	掃桿埔 旺角	40,000 6,680
太陽飛馬	旺角大球場	旺角	6,680
日之泉JC晨曦	青衣運動場	青衣	1,500
屯門	屯門鄧肇堅運動場	屯門	2,200
橫濱FC香港	將軍澳運動場	將軍澳	3,500

今屆經典球賽

• 2013年12月22號喺屯門鄧肇堅運動場，屯門主場對橫濱FC香港，賽至補時3分鐘，横濱FC香港開出角球，屯門球員李明喺無人壓逼下，衝入小禁區跳起頭槌輕鬆頂入自己龍門，屯門最終因為呢個烏龍波以1-2輸咗。事後屯門體育會終止咗同球隊嘅管理公司合作，即時收回間公司管理屯門甲組隊嘅管理權，取消晒所有屯門甲組同埋預備組嘅職球員喺香港足球總會嘅註冊，保留向管理公司追究有關損失嘅權利。

• 2014年1月5號喺青衣運動場，日之泉JC晨曦主場對愉園，愉園半場已經落後0:3，全場大敗0:5。比賽結束之後，多名一早已經喺球場部署嘅廉政公署調查人員，高調衝入愉園更衣室，先後單獨帶走巢鵬飛、樊偉軍、劉嘉城、保素域斯、沙沙麥斯、賓曹同埋副領隊梁倬軒一共七名愉園職球員返廉署總部調查，懷疑渠哋打假波。而愉園其餘球員好似李圳業、蔡國威、楊賜麟同埋教練沙治奧等至少19人亦被帶走協助調查。