Wikipedia:是日正文/2021年5月

生命進化時間線

生命,係指緊將生物同埋非生物區分開嘅一種特質。有生命嘅嘢會進行各種各樣嘅生物作用,好似係出世生長衰老、同埋死亡呀噉,而冇生命嘅嘢唔會做呢啲嘢。冇生命嘅嘢可以係本嚟有生命但係冇咗,又或者係根本一開始就係冇生命嘅死物。有生命嘅嘢-即係生物-又有得分做好多唔同種,包括咗真菌植物、同埋各種嘅動物,而研究呢啲生物嘅科學領域就係生物學

「有生命」同「冇生命」之間嗰條分間線查實唔係非黑即白嘅-宇宙入面有一啲嘢具有某啲生命應有嘅特徵,但係又唔有齊嗮呢啲特徵。例如係病毒噉:佢哋嘅正常個體好似生物噉樣曉繁殖,但係佢哋只有當身處喺生勾勾嘅細胞入面嗰陣先至識噉做,而如果佢哋唔喺生勾勾嘅細胞體內,佢哋會唔識做呢啲生命活動,變到好似冇生命嘅死物噉,所以病毒身處咗喺生物同埋死物之間嘅灰色地帶嗰度。

地球上面,生命係由大約 42.8 億前左右開始有嘅,即係地球個喺 44.1 億年前形成咗打後冇幾耐嘅時間(地球估計大約係喺 45.4 億年前形成嘅)。有關第一條生命係點樣誕生同埋係點嘅樣,目前科學界都仲未有啲乜嘢定論,雖然生物學家諗咗好多個假說出嚟。目前地球上已知最早嘅生命證據係嚟自細菌嘅微化石嘅-例如係有喺澳洲掘出嚟嘅 34.5 億年老嘅石頭,佢哋裏面內含一啲微生物,呢啲微生物幫到手了解早期生物嘅樣,而喺 2016 年,科學揾到有 355 個基因係現存嘅生物冚唪唥都有嘅-而呢 355 個基因應該就係最終共同祖先(last universal common ancestor,「LUCA」)嘅基因。雖然呢 355 基因顯示,呢個最終共同祖先係一隻複雜嘅生物,所以未必係第一條生命。

自從地球喺超遠古嘅時代形成咗之後,地球嘅環境透過各種嘅地質活動等嘅過程係噉變緊,而呢啲環境改變令到生物物種要一代一代噉慢慢變樣,嚟到去適應新嘅環境-即係所謂嘅進化。而當生命散佈到去成個地球嗰度,唔同嘅生物物種就會適應各自嘅環境,變到更加叻喺自己嘅環境度生存(但係唔一定變到更加「高等」)。呢啲進化過程令到地球有好豐富嘅生物多樣性,有住各種唔同嘅生物。

早喺古希臘時期,希臘哲學家阿里士多德經已有喺度嘗試將生物物種分類,但係呢啲早期嘅物種分類法有好多問題,例如係古希臘人根本唔知有細菌呢樣嘢存在,更加唔好話識得將細菌分類。今日廿一世紀通用嘅嗰套生物物種分類法係源自於 18 世紀瑞典自然學林奈嗰套分類法嘅(但係林奈嗰套嘢都因為打後嘅新發現而俾人改過好多次)。

到咗廿一世紀為止,以人類所知,成個宇宙係得地球有生命,但係事實係冇證據顯示地球係唯一一個有可能有生命嘅地方,所以有好多科學家就喺度致力噉揾外星生命。除咗噉,由廿世紀開始科學界就有咗人工生命呢個諗頭-用電腦模擬或者人工合成嘅方法嚟憑空噉整啲有生命嘅嘢出嚟。雖然目前為止人類仲未揾到外星生命或者成功噉創造人工生命,但係呢啲研究對於生物學同埋醫學等嘅相關領域嘅發展有咗好大嘅幫助。(成篇文章……)

以前嘅正文: 古典力學進化