Wikipedia:是日正文/2024年9月
注意力係一系列嘅行為同認知過程，涉及一個認知系統由接收到嘅資訊當中揀一部份出嚟集中處理，並且忽略嗰啲唔係集中處理緊嘅資訊：一個認知系統無時無刻都喺度接收大量嘅資訊，包括由外界嚟嘅感官資訊同有關自身內部狀態嘅資訊；好多時，為咗要有效解決佢生存所需要解決嘅問題，個認知系統要集中處理同佢生存最有啦掕嗰啲資訊，同時要忽略嗰啲同佢生存冇乜啦掕嘅資訊。喺對注意力嘅科學研究上，科學家一般都會將注意力想像成一種有限嘅資源，由個認知系統嘅決策系統決定要點分配落去唔同嘅資訊源嗰度。喺包括人在內嘅脊椎動物當中，腦係認知嘅中心，而大腦皮層當中嘅額葉同頂葉之間嘅網絡同注意力控制零舍有關。
有關注意力嘅研究喺認知心理學、認知科學、神經科學、市場學以及教育學等嘅多個領域上都係受關注嘅課題。注意力研究會剖析邊啲感官資訊或者訊號傾向吸引得到人同動物嘅注意力、呢啲資訊同訊號會點樣影響神經細胞嘅狀態、以及注意力同第啲行為認知過程（好似係記憶）之間嘅關係。除此之外，精神病理學亦都有研究創傷性腦損害等嘅病變會點影響病人喺注意力方面嘅表現。
注意力同心流體驗好有關係。心流係一種特殊嘅心理狀態，涉及個人極度專心做一樣有挑戰性嘅作業－「有挑戰性嘅作業」可以係打波、捉棋、畫畫以至打機呀噉。經歷過心流嘅人後尾講返出嚟話，心流唔單只令到佢哋好專心，仲令到佢哋覺得時間好似過得好快、喪失自我意識同埋好想再做多次嗰樣作業，而且心流仲好幫到個人提升佢喺嗰樣作業上嘅技術。因為噉，心流同注意力研究對於教育學、管理學以及遊戲設計等方面都相當有應用價值－例如一個遊戲設計師，佢通常都會想啲玩家喺玩佢整嘅遊戲嗰陣經歷心流，所以會有興趣了解呢方面嘅研究。 (成篇文章……)