Wikipedia:是日正文/2025年12月
腦係一隻動物嘅神經系統嘅中樞。脊椎動物冚唪唥都有腦，無脊椎動物大部份都有腦，淨係得一啲好原始好簡單嘅動物－好似係白蚱同海星噉－會有神經系統但冇腦。喺人等嘅脊椎動物當中，腦生喺個頭嗰度，俾硬淨嘅頭殼包實保護，會近眼耳口鼻呢啲感覺器官，而喺功能上，腦扮演咗身體嘅資訊處理中心：一啲基本嘅反射動作（指一啲進化嚟快速保護身體嘅簡單動作，例如係「見到有物件飛向自己對眼就即刻合埋眼」）可以由脊椎或者周邊神經構造直接處理，不過比較複雜嘅身體控制就要靠個腦－腦會無時無刻係噉整合由感官同體內收到嘅資訊，然後產生訊號，佈滿身體嘅神經線會將呢啲訊號帶去身體各部，等腦能夠掌控身體啲肌肉郁動同荷爾蒙分泌等嘅重要生理活動。
腦嘅複雜度同智能息息相關：人腦齋係塊大腦皮層（指腦最外面嗰浸）就經已有成 150 至 330 億粒互相緊密連繫嘅神經細胞咁滯，無論神經細胞數量定神經細胞之間嘅連繫緊密度都係地球上嘅動物之冠－相比之下，（例如）貓成個腦加埋都係得嗰 7 億幾粒神經細胞；人腦嘅高複雜度令人能夠做高階嘅思考等嘅認知功能，因而具有地球動物當中最高嘅智能。
神經科學同心理學等嘅認知科學領域會對腦進行研究：廿一世紀初嘅認知科學一般同意心腦同一論，主張腦就係心靈嘅所在，會當正腦係一部生物版嘅電腦噉－呢啲領域嘅科學家普遍認為，腦同數碼電腦一樣會由外界吸收資訊、儲起啲資訊同埋處理啲資訊，分別只不過係腦用神經電流機制表示同處理資訊，數碼電腦用嘅就係電子機制；基於呢個諗法而搞嘅認知科學研究喺廿世紀取得咗相當嘅成功，而且人工神經網絡等嘅諗頭仲啟發咗 AI 上嘅突破。 (成篇文章……)