Wikipedia:是日正文/2026年6月
古典電磁學又叫古典電動力學，喺物理學上係電磁學當中嘅一套理論框架，運用牛頓力學思考電荷嘅行為，解釋電同磁相關嘅現象。呢方面嘅研究原則上可以追溯到去成古希臘咁久遠，不過要到咗 17 至 18 世紀之後，電磁學先至開始有飛躍性嘅發展，出咗麥士維方程組等嘅重大發現。
古典電磁學最基本嘅概念係電荷：喺一般環境下，一個人攞住嚿由某啲特定物料－例如動物嘅毛皮或者琥珀等－整嘅物體，再捽嚿嘢落去第嚿物體嗰度，然後就會發現嚿嘢變到能夠吸引頭髮同發泡膠等輕嘅物體，呢種現象就係所謂嘅摩擦起電效應－用摩擦力令物體表面產生電荷。而古典電磁學就係運用牛頓力學上嘅概念，分析電荷點樣喺電場嘅影響之下流動。
一般嚟講，古典電磁學同第啲古典物理學理論一樣，喺工程學當中都仲係廣受採用：現代物理學上嘅研究經已表明咗，當研究嘅物體好細（例如係得原子咁大）或者係個環境入面嘅力場好弱嗰陣，古典電磁學做嘅預測會失準，而喺呢啲情況下，要靠量子電動力學先可以做到準確嘅預測。不過喺工程學上，分析者好多時都淨係需要考慮一般地球環境下嘅電磁現象，而喺呢種情況下，古典電磁學都仲係好使好用。 (成篇文章……)