中國國家鐵路集團

中國大陸鐵路嘅營運者,中國嘅國有獨資企業

 中國國家鐵路集團有限公司粵拼zung1 gwok3 gwok3 gaa1 tit3 lou6 zaap6 tyun4 jau5 haan6 gung1 si1英文China Railway Corporation,縮寫CR)係中華人民共和國嘅國有獨資企業,受中央管理,而家由財政部代表國務院履行出資人職責[5][1]。間公司負責中國大陸境內嘅鐵路客運、貨運業務,亦負責國際聯運嘅列車,同時負責相關嘅鐵路管理、維護、建設、安全責任[1]。呢間國企創立喺2013年3月14號,依據《中華人民共和國全民所有制工業企業法》設立,註冊資金1兆360億元人民幣[1],由原任鐵道部部長盛光祖做第一任總經理[6],受交通運輸部、國家鐵路局嘅行業監管[5]

中國國家鐵路集團有限公司
中国国家铁路集团有限公司
China Railway Corporation
China Railways.svg
公司嘜頭(亦係中國大陸鐵路路徽)
China Railway Corporation headquarters (20180627181228).jpg
集團總部駐地嘅大樓
類型國有獨資企業(中國中央企業[1]
行政級別正部級[2]
前身中央人民政府鐵道部(1949-1954)
中華人民共和國鐵道部(1954-1970)
中華人民共和國交通部(1970-1975)
中華人民共和國鐵道部(1975-2013)
中國鐵路總公司(2013-2018)
成立2013年3月14號[1]
總部地址Flag of the People's Republic of China.svg 中國北京市海淀區復興路中文復興路 (北京)10號
郵政編碼100038
電話號碼+86 (0)10 51841216
業務地區中國大陸境內、及國際聯運列車
緊要人物陸東福中文陸東福總經理兼黨組書記)[3]
產業鐵路運輸(貨物、旅客運輸及鐵路管理維護)
服務鐵路運輸、管理、維護、建設
年營業額10154.49億元人民幣(2017年)[4]
稅前盈餘124.68億元人民幣(2017年)[4]
稅後盈餘18.19億元人民幣(2017年)[4]
總資產7兆6483億8千7百元人民幣(2017年)[4]
資產淨值48475.65億元人民幣(2017年)[4]
東主中華人民共和國 中華人民共和國國家所有(財政部代表國務院履行出資人職責)[5]
員工數204萬5千6百人
子公司18間鐵路公司
3間專業運輸公司
網址官方網站

呢間國營鐵路公司創立之初嘅名叫中國鐵路總公司zung1 gwok3 tit3 lou6 zung2 gung1 si1,簡稱鐵總,到2018年12月5號改名叫現時呢個名[7]。而佢嘅前身係現已唔存在嘅鐵道部。

中國鐵路總公司嘅前身係鐵道部,鐵道部政企合一,同時佢有自己把持嘅司法系統。由於佢特殊嘅背景,喺權力系統中喐佢唔到,人稱「國中之國」,利益集團盤據,靠壟斷地位形成貪腐温床,公眾服務上亦惹起民怨,畀人稱做「鐵老大」。後來一系列嘅機緣,先至裁撤到鐵道部[8]。裁撤後政企分開,而呢間公司承擔企業職責。呢次事件係中國大部制改革一部份,亦即簡政放權、轉變職能[9]

2013年3月10號,國務委員國務院秘書長馬凱建議國務院將《國務院機構改革和職能轉變方案》交畀第十二屆全國人民代表大會第一次會議度審議[10]。呢份方案中,提出將鐵道部嘅行政職責同企業職責分開,其中擬定鐵路發展規劃同政策嘅行政職責劃畀交通運輸部,喺交通運輸部之下成立國家鐵路局,承擔浄低嘅行政職責,比如擬定鐵路技術標準、監督管理鐵路安全生產以及運輸服務質量、鐵路工程質量[10]。而企業職責交晒畀新組建嘅中國鐵路總公司,比如鐵路嘅管理調度、客貨運、專運、特運、鐵路建設、承擔安全責任等。分開職責後,會撤銷鐵道部[10]

2013年3月14號,第十二屆全國人民代表大會第一次會議表決通過《國務院機構改革和職能轉變方案》[11][12]。當日,國務院批准中國鐵路總公司成立(國函〔2013〕47號),註冊資金1兆360億元人民幣,將原先鐵道部嘅資產、負債、人員劃晒入公司,同時將原先鐵道部屬下18間鐵路局(包括廣州鐵路集團公司、青藏鐵路公司)、3間專業運輸公司、其他企業權益作爲新公司嘅國有資本[5]。亦係當日,依據《中華人民共和國全民所有制工業企業法》設立新公司[12],由原任鐵道部長盛光祖正式擔任總經理、兼中共黨組織書記[6]。設立公司後,順路孭埋鐵道部爭落嘅數,政府以赤字爲由,爲佢提供資金補助、稅收優惠等全面支援,亦爲佢發行鐵路建設相關嘅債券[12]

2013年3月17號,喺原先鐵道部嘅駐地門口,除低鐵道部塊牌,掛上中國鐵路總公司塊新牌[13]

2013年10月11號,公司嘅過渡性網站開通,之後推出正式官網,同時原先鐵道部嘅網站停咗[14]

2016年10月,總經理兼黨組書記換人,盛光祖換成陸東福。

2017年,開始將轄下鐵路局改組成公司。按計劃,當年11月底前,啲鐵路局要將法人結構改爲公司,改咗工商登記,年底完成公司制改革,2018年按呢個新體制運作[15]

2018年12月5號,中國鐵路總公司改名,改叫中國國家鐵路集團有限公司[7]

亦係2018年12月,中辦、國辦印發《行業公安機關管理體制調整工作方案》,話要將警察、政府、企業分清楚,就將原先雙重領導嘅鐵路公安、森林公安、交通公安統一劃畀公安部領導[16]。2019年2月27號,按照《公安部職能配置、內設機構和人員編制規定》,裁切咗鐵路公安局,重新組建嘅鐵路公安局直接畀公安部管(公安部十局),鐵路公安唔再由公司管[17]

職責、監管

中國鐵路總公司承擔原先鐵道部嘅企業職責,具體有:鐵路營運方面,統一調度指揮鐵路運輸,經營管理鐵路嘅客運、貨運,承擔國家規定嘅公益性鐵路運輸,同埋關係到國計民生嘅重點運輸、特運、專運、搶險救災運輸;鐵路建設方面,擬定鐵路投資建設計劃,提出國家鐵路網建設、籌資方案嘅建議,負責建設項目嘅前期工作,管理建設項目。另外公司要承擔鐵路安全生產嘅主體責任,負責國家鐵路運輸安全[1]

中國鐵路總公司成立後,外界反應有喜有憂。一方面政企唔分嘅體制無咗,點都係一大改變;但質疑亦好多,比如原先「鐵老大」惡劣嘅服務作風可能有排先轉變到[18]。有評論擔心,呢間公司繼承咗鐵道部龐大嘅企業帝國,靠住壟斷經營、規模優勢,可能同相關政府部門有利益輸送,好難有行業監管,改革後公眾可能面臨變形後嘅「鐵老大」[8]。而家確定監管鐵路行業嘅係國家鐵路局,但係行政級別上,國家鐵路局係副部級,間公司係正部級,副部級去監管正部級本身好引起爭議,而國家鐵路局比較遲掛牌,係因爲本身佢同總公司有好多領域交叉,分唔清彼此職責,而鐵路局內一啲核心人士來自原先鐵道部,令評論擔心會唔會落力監管,但有相關人士話而家鐵路改革先啱啱起步[19]。有評論從中國大陸體制睇,認爲呢番改革換湯唔換藥,實質同以前無乜唔同,鐵道部嘅解體係表面上嘅,總公司表面上係公司,但佢唔自負盈虧,係靠政府支撐嘅組織[20],由於「國進民退」嘅體制(國企入、民企出),貪腐温床、低效弊病依然埋藏,所謂國企改革其實無點進步到[21]

組織機構

中國國家鐵路集團現時有以下呢啲機構組織,當中有內設機構27個,直屬機構3個,派出機構12個,鐵路公司18個,專業運輸公司3個,其他企業12個,所屬事業單位3個[22]

呢間公司原本係世界上少數有自己管理嘅警察系統嘅鐵路公司,鐵路公安局(公安部十局)當時係國務院授權管理嘅機構,但2019年2月之後,鐵路公安唔再受公司管理,只受公安部管[17]

公司機關

內設機構

  • 辦公廳(亦係中共黨組辦公室、董事會辦公室)
  • 發展和改革部
  • 企業管理和法律事務部
  • 財務部
  • 科技和信息化部(亦係總工程師室)
  • 人事部(亦係中共黨組組織部)
  • 勞動和衛生部
  • 國際合作部(亦係港澳臺辦公室)
  • 經營開發部
  • 物資管理部
  • 運輸統籌監督局(亦係總調度長室)
  • 客運部
  • 貨運部
  • 調度部
  • 機輛部
  • 工電部
  • 建設管理部
  • 安全監督管理局
  • 審計和考覈局
  • 監察局(合署辦公:中共黨組紀律檢查組)
  • 宣傳部(亦係中共黨組宣傳部)
  • 黨組巡視工作領導小組辦公室
  • 中華全國鐵路總工會
  • 全國鐵道團委
  • 直屬機關黨委
  • 離退休幹部局
  • 川藏鐵路建設工程建設總指揮部辦公室(亦係呢項工程嘅領導小組)

直屬機構

  • 工程質量監督管理局(合署辦公:工程管理中心)
  • 資金清算中心(同一機構兩塊牌:中國鐵路財務有限公司)
  • 檔案史誌中心

派出機構

  • 安全監督管理特派員辦事處(6個):分別响上海、瀋陽、北京、武漢、成都、蘭州
  • 審計特派員辦事處(6個):分別响上海、瀋陽、北京、武漢、成都、蘭州

下屬企業

鐵路公司

 
各間鐵路公司大致嘅管轄範圍
鐵路公司 負責地區 中國地理大區
中國鐵路廣州局集團有限公司 廣東中東部、湖南大部、海南 中南
中國鐵路南寧局集團有限公司 廣西、廣東西部
中國鐵路武漢局集團有限公司 湖北大部、河南南部、局部安徽
中國鐵路鄭州局集團有限公司 河南中北部、山西南部
中國鐵路南昌局集團有限公司 江西、福建、湖南局部 華東
中國鐵路濟南局集團有限公司 山東大部
中國鐵路上海局集團有限公司 上海、江蘇、安徽大部、浙江
中國鐵路哈爾濱局集團有限公司 內蒙古東北部、黑龍江大部 東北
中國鐵路瀋陽局集團有限公司 遼寧、吉林、內蒙古東南部、黑龍江南部、河北東北部
中國鐵路北京局集團有限公司 北京、河北大部、天津、山東西部、河南北部、山西東部 華北
中國鐵路呼和浩特局集團有限公司 內蒙古大部
中國鐵路太原局集團有限公司 山西大部
中國鐵路成都局集團有限公司 四川大部、重慶、貴州大部、雲南局部 西南
中國鐵路昆明局集團有限公司 雲南大部、四川同貴州局部
中國鐵路青藏集團有限公司 西藏
青海 西北
中國鐵路蘭州局集團有限公司 甘肅大部、寧夏、內蒙古局部
中國鐵路烏魯木齊局集團有限公司 新疆、甘肅局部
中國鐵路西安局集團有限公司 陝西大部、四川東北部

呢18間鐵路公司現時未喐,維持原樣,但據內部人士,有方案打算將呢啲鐵路公司合併做地方鐵路集團公司,雖然未定案,但遲早會喐手,現時喐手最難在於地方鐵路資產問題。而家流出嘅方案中,呢18間鐵路公司合併成7間地方鐵路集團公司,當中[23]

  • 華南鐵路集團公司,合併自廣鐵集團、柳州鐵路局,總部喺廣州
  • 華中鐵路集團公司,合併自廣鐵集團長沙公司,及南昌、鄭州、武漢鐵路局,總部喺武漢
  • 東北鐵路集團公司,合併自瀋陽、哈爾濱鐵路局,總部喺瀋陽
  • 西北鐵路集團公司,合併自烏魯木齊、蘭州、西安鐵路局,總部喺西安
  • 華北鐵路集團公司,合併自呼和浩特、太原、北京鐵路局,及大同鐵路公司,總部喺北京
  • 華東鐵路集團公司,合併自濟南、上海鐵路局,總部喺上海
  • 西南鐵路集團公司,合併自成都、昆明鐵路局,總部喺重慶

專業運輸公司

其他企業

  • 中國鐵路投資有限公司
  • 中國鐵道科學研究院集團有限公司
  • 中國鐵路經濟規劃研究院有限公司
  • 中國鐵路信息技術有限責任公司
  • 中國鐵路設計集團有限公司
  • 中國鐵路國際有限公司
  • 鐵總服務有限公司
  • 中國鐵道出版社有限公司
  • 《人民鐵道》報業有限公司(鐵道影視音像中心)
  • 中國鐵路專運中心
  • 中國鐵路文工團
  • 中國火車頭體育工作隊

下屬事業單位

  • 鐵道黨校
  • 鐵道戰備舟橋處
  • 中國鐵道博物館

睇埋

  1. 1.0 1.1 1.2 1.3 1.4 1.5 "中國鐵路總公司簡介". 中國鐵路總公司. 2014年3月23號. 喺2015年7月21號搵到.
  2. "中國鐵路總公司 未來路向何方?". 大公網. 喺2015年7月21號搵到.
  3. "總公司領導". 中國鐵路總公司. 喺2018年9月16號搵到.
  4. 4.0 4.1 4.2 4.3 4.4 "中國鐵路總公司2017年年度報告". 上海清算所. 2018年4月28號. 喺2020年3月23號搵到.
  5. 5.0 5.1 5.2 5.3 "國務院關於組建中國鐵路總公司有關問題的批覆". 國務院辦公廳. 中華人民共和國中央人民政府. 2013年3月14號. 喺2015年7月21號搵到.
  6. 6.0 6.1 "中國鐵路總公司今日下午掛牌成立 盛光祖任總經理兼黨組書記". 每日經濟新聞網. 2013年3月14號. 喺2015年7月21號搵到.
  7. 7.0 7.1 "鐵總更名獲准 將改爲「中國國家鐵路集團有限公司」". 鳳凰資訊. 2018年12月6號. 喺2019年2月18號搵到.
  8. 8.0 8.1 "別了,鐵道部!". 搜狐評論. 喺2015年7月22號搵到.
  9. "機構改革 政企不分只玩形式會搞成四不像". 搜狐評論. 喺2015年7月22號搵到.
  10. 10.0 10.1 10.2 "關於國務院機構改革和職能轉變方案的說明". 新華社. 中華人民共和國中央人民政府. 2013年3月10號. 喺2015年7月21號搵到.
  11. "關於國務院機構改革和職能轉變方案的決定". 新華社. 中華人民共和國中央人民政府. 2013年3月14號. 喺2015年7月21號搵到.
  12. 12.0 12.1 12.2 "鉄道新会社、中国が設立 補助金など全面支援" (日文). 日本經濟新聞. 2013年3月15號. 喺2015年7月25號搵到.
  13. "「鐵道部」正式摘牌 掛上「中國鐵路總公司」(圖)". 新華網. 鳳凰網. 2013年3月17號. 喺2015年7月21號搵到.
  14. "中國鐵路總公司網站低調上綫 正式網站正在建設中". 觀察者網. 2013年10月11號. 喺2015年7月21號搵到.
  15. "鐵路局公司制改革細節:年底前完成 明年起按新體制運行". 看法網. 2017年10月21號. 原著喺2018年6月12號歸檔. 喺2018年9月16號搵到.
  16. "「警是警、政是政、企是企」,全國行業公安機關管理體制正在調整". 搜狐. 2018年12月31號. 喺2020年3月23號搵到.
  17. 17.0 17.1 "公安部內設機構大調整:多部門整合做強辦案部門,設情報指揮中心". 搜狐. 2019年5月13號. 喺2020年3月23號搵到.
  18. "望鐵老大作風隨鐵道部一起消失". 大洋網. 2013年3月11號. 原著喺2016年3月4號歸檔. 喺2015年7月22號搵到.
  19. "副部國家鐵路局揭牌監管正部鐵總引爭議". 第一財經日報. 新浪財經. 2014年1月8號. 喺2015年7月22號搵到.
  20. "解体を阻む「利権」「負債」「景気」" (日文). 時事通信社. 喺2015年7月22號搵到.
  21. "改革失敗なら中国にとって「命取り」に" (日文). 時事通信社. 喺2015年7月22號搵到.
  22. "機構組織". 中國國家鐵路集團有限公司. 2020年1月13號. 喺2020年3月24號搵到.
  23. "18個地方鐵路局或將組7大公司". 經濟觀察網. 2013年3月21號. 喺2015年7月25號搵到.

出面網頁