中華殉道聖人堂 (加拿大)
中華殉道聖人堂（英文：Chinese Martyrs Catholic Church），當地粵語天主教徒簡稱聖人堂、CMCC 或者 CMC，係加拿大多倫多總教區嘅一個主要講粵語嘅天主教堂區，本來叫中華殉道真福堂（Blessed Chinese Martyrs Chinese Catholic Mission，簡稱真福堂[註 1]或者 BCM），2000年10月1號中華殉道真福封聖之後改名[1]。
佢係多倫多總教區入面第二個華人堂區；技術上可以話係嘉模聖母堂嘅分堂[2]。雖然地理位置喺萬錦，但係因為歷史原因，有時會話係士嘉堡嘅華人堂區。
建築
編輯教堂建築物1994年起好[3]，係三層建築，地面兩層，地庫一層。大禮堂喺地面同樓上騎樓，但係兩部分並唔互通，要出走廊上落樓梯再入過去；地庫就有個小禮堂。入面本來冇𨋢，但係後來加咗。
大禮堂係現代扇形設計，但係前面嘅窗裝咗中國畫風格嘅彩色玻璃，畫嘅係芥子嘅比喻[註 2]、野百合花嘅比喻[註 3]同七件聖事[4]，前面嘅十字聖像本來冇，係2006年之後先後來加上去。
堂區
編輯堂區喺1987年成立，本來並冇堂址，而係係借學校嚟做主日彌撒，亦都唔係喺萬錦，而係喺士嘉堡，萬錦嘅堂址係1993年開始起，1994年起好[3]。
佢用中華殉道做名係因為喺1987年堂區成立之前，時任主教要求用華裔聖人做名，但係當時根本未有，所以就用咗嗰陣仲係真福品嘅全部120個中華殉道者做名[2]。
交通
編輯約克區公車局2號線嘅 Featherstone 巴士站喺正中華殉道聖人堂外出。多倫多公車局最近嘅巴士站喺大約15分鐘外，行士刁大道嘅53號線有站喺萬錦路，行過去大約15分鐘；130號嘅 Middlefield 廻旋處就近少少，但係唔係近好多。
因為如果由士嘉堡過嚟，唔揸車其實有啲交通不便，每逢主日朝早，堂區都會安排接駁巴士來往士嘉堡同教堂之問。
北區分堂
編輯2022年，中華殉道聖人堂獲多倫多總教區北區主教批准以屬下分支嘅形式，喺新市開一個 ｢北區華人牧民中心｣，正式改名叫北區華人聖若翰堂（St. John the Baptist Northern Chinese Catholic Mission）[5]。
出面網頁
編輯睇埋
編輯註
編輯- ↑ 當時臺裔嘅本堂神父本來打算跟臺灣簡稱 ｢華福堂｣，但係呢個簡稱喺粵語從來都冇用過。
- ↑ 〈馬太福音〉13章31-32節（基督教和合本：〈太〉13:31-32、天主教思高本：〈瑪〉十三31-32）.
- ↑ 〈馬太福音〉6章25-34節（基督教和合本：〈太〉6:25-34、天主教思高本：〈瑪〉六25-34）.
攷
編輯- ↑ 1.0 1.1 尹雅白 (2012)。〈加拿大傳教生活的回憶〉 (繁體中文)。喺2023年10月6號搵到。
- ↑ 2.0 2.1 葉少玲。〈「中華殉道真福堂」的誕生〉 (繁體中文)。喺2023年10月6號搵到。
- ↑ 3.0 3.1 3.2 中華殉道聖人堂。〈堂區歷史〉 (英文)。Archdiocese of Toronto。喺2023年10月6號搵到。
- ↑ 〈彩窗設計〉 (香港中文)。中華殉道聖人堂。原著喺2007年8月23號歸檔。喺2023年11月10號搵到。
- ↑ 鄧建衛。〈天主教北區華人聖若翰堂簡史〉 (繁體中文)。Archdiocese of Toronto。喺2023年10月6號搵到。