代數基本定理(Fundamental Theorem of Algebra)係講，任何嘅一元複係數多項式，都至少會有一個複數根。一般再延伸出，n次一元複系數多項式，啱啱好有n個複數根。
呢個定理亦都即係話，複數呢個場係代數封閉嘅（呢個正正就係代數封閉嘅定義）。
雖然呢個定理個名叫做「代數基本定理」，但係佢並唔「代數」，呢個定理無一個純代數嘅證明，因為每一個證明都會用到實數嘅完備性；對現代嘅代數學嚟講，佢亦都唔係最「基本」嘅，起呢個名嘅原因係當時嘅「代數」指嘅係「方程理論」（theory of equation）。
