元宇宙

元宇宙（粵拼：jyun4 jyu5 zau6；英文：metaverse，嚟自 meta 同 universe 嘅結合）係廿一世紀初興起嘅一個資訊科技諗頭。根據元宇宙嘅諗頭，任何現實嘅嘢都可以用電腦創造嘅虛擬嘢取代：有資訊科技工作者就想建立一個由虛擬實境（VR）同擴張實境（AR）組成嘅虛擬世界，用呢個虛擬世界做互聯網嘅延伸​——​用家唔淨只可以喺呢個世界裏面郁動，仲有得透過個世界玩遊戲同埋使用第啲互聯網服務，例如網購同社交媒體呀噉，做到近乎「完全齋靠個虛擬世界生活」咁滯；元宇宙相關嘅諗頭，好多時仲會結合埋 AI 技術，打算做到（例如）「教部電腦透過 VR 頭罩睇用家眉頭眼額，按用家情緒決定要點樣改變用家體驗」。

網上遊戲《第二人生》被人指係元宇宙嘅初型；想像用家戴住 VR 頭罩，由玩家角色對眼嘅角度睇個虛擬世界，仲有得透過呢個世界做（例如）網購同社交媒體等嘅第啲日常生活功能。

有唔少資訊科技工作者主張，元宇宙會引起互聯網科技嘅大變。而喺 2021 年，Facebook 嘅創辦人朱克伯格將佢間公司嘅名改做 Meta 平台，反映佢開發元宇宙嘅決心，結合電腦科學同人機互動等多個領域嘅研究者一齊研發元宇宙。

基礎概念

睇埋：人機互動、投入科技同虛擬世界

元宇宙嘅諗頭可見於 1992 年嘅科幻長篇小說《雪崩》。據講本小說係噉描述元宇宙嘅：

「

粵文翻譯：查實阿廣根本唔喺呢度。佢身處喺個電腦產生嘅宇宙裏面，而佢部電腦喺度將個宇宙畫落佢對眼罩度同埋泵落佢對耳筒度。喺行話當中，呢個假想地方叫元宇宙。阿廣花好多時間喺元宇宙裏面（活動）。

」

又或者以下呢段噉：

「

粵文翻譯：佢（阿廣）當然唔係見緊真嘅人啦。呢啲嘢完全係由佢部電腦按照嚟自光纖線嘅指示畫出嘅郁動插圖（『郁動插圖』比喻虛擬世界嘅圖像）。啲人係叫做『頭像』嘅軟件。佢哋（啲頭像）係啲人用嚟喺元宇宙入面彼此溝通嘅聲畫身體。

」

涉及技術

附圖 1；一個人戴住 VR 頭罩體驗個虛擬世界，個頭罩可以內置腦機介面同眼動追蹤等嘅功能。

基礎技術

睇埋：延展實境同投入感

要做到「令用家完全投入個虛擬世界」，元宇宙起碼要用以下呢啲技術：

• 虛擬實境頭罩，用嚟向用家呈現個虛擬世界嘅圖像同聲。
• 觸控用家介面，畀用家感受「掂到」虛擬世界嘅物件。
• 腦機介面（BCI），可以內置喺個頭罩裏面，畀用家齋靠諗嘢嚟控制虛擬世界嘅嘢。
• 加密電子貨幣同 NFT，方便用家喺虛擬世界裏面做買賣。
• 智能感應器
• 擴張實境

... 呀噉。

營銷技術

睇埋：網上廣告同虛擬舖頭研究

元宇宙係個完全由電腦控制嘅虛擬空間。噉即係話，運作元宇宙嘅人可以隨意攞元宇宙入面嘅任何資訊，而呢點可以攞嚟落廣告：

• 眼動追蹤：用嚟探測用家對眼望緊乜，可以用嚟攞到「虛擬世界裏面嘅呢個廣告有幾多人睇」噉嘅資訊；Meta 平台跟住可以將呢啲資訊賣畀第啲企業，畀後者用嚟做落廣告方面嘅商業決策。
• 情感運算：假如用家嘅 VR 頭罩能夠探測用家嘅情緒（可以睇吓 HRV 等嘅概念），就可以攞嚟（例如）探知用家對某幅廣告有咩情緒反應，而呢點可以用嚟評估一個廣告係咪有效。
• 大數據：可以用嚟分析用家嘅行為，細至「用咗幾多時間摷有關呢隻呢隻產品嘅資訊」都可以分析。

例如附圖 1 噉：附圖 1 顯示個人戴住 VR 頭罩體驗個虛擬世界；想像如果個虛擬世界係元宇宙，玩家可以透過操作個世界入面嘅物件嚟做網購，而且再想像（例如）個頭罩內置眼動追蹤，識探測用家對眼望緊邊，知用家望緊元宇宙邊忽，將「位用家用咗幾多秒望呢幅呢幅廣告」等嘅數據傳返去 Meta 平台嘅數據庫度。順帶一提，有好多人都係因為「元宇宙太易畀營銷工作者攞數據同埋操弄消費者」，所以唔睇好元宇宙。

睇埋

• 虛擬經濟、用家化身
• 資訊空間、數碼鬅客
• 新媒體
• 桶中腦

文獻

• Rauschnabel, P. A., Felix, R., Hinsch, C., Shahab, H., & Alt, F. (2022). What is XR? Towards a framework for augmented and virtual reality. Computers in Human Behavior, 133, 107289.
• Shin, D. (2022). The actualization of meta affordances: Conceptualizing affordance actualization in the metaverse games. Computers in Human Behavior, 133, 107292，呢篇文講到，元宇宙嘅空間設計（簡化講）會對用家「有幾樂意用」造成具體影響。
• The Metaverse: Concepts and Issues for Congress (PDF), August 26, 2022，呢份報告總結咗當時嘅元宇宙主要概念。

拎

• （英文） Metaverse，呢篇文簡介元宇宙嘅概念。