用家化身

用家化身（粵拼：jung6 gaa1 faa3 san1；英文：avatar ）係視像遊戲或者其他投入科技當中成日講到嘅一個概念，指一位用家用嚟喺個虛擬世界入面代表自己嘅影像，當中「影像」可以係一幅 2D 嘅圖（頭像）或者一個 3D 模型都得。

第二人生裏面嘅一個 3D 模型用家化身。

用家化身喺好多互聯網應用上都好重要，例如一般認為 MMORPG 其中一個最大嘅賣點就係，呢啲遊戲會畀玩家設計自己嘅角色，玩家鍾意變身做咩人（以至人以外嘅奇幻種族）都得，畀到玩家一種「去咗第個世界，體驗緊另一段人生」噉嘅感覺。

主要應用

内文：電子遊戲同投入科技

用家化身喺電子遊戲當中好常見。好多電子遊戲都會將畀玩家投入去一個虛擬世界裏面，尤其係動作遊戲同電子 RPG 等嘅類型，要求玩家控制住個化身，透過化身嚟同遊戲世界入面嘅物件互動—

• 玩家部熒光幕上嘅畫面，往往係會影住玩家化身眼前嘅嘢（input：化身理應會睇到嘅 input），
• 而玩家撳掣就會令個化身郁動（output：玩家撳掣，會令到化身同遊戲世界嘅嘢互動）。

喺好多遊戲當中，玩家化身係定死咗冇得變嘅，例子可以睇吓《俠盜獵車手 III》噉。亦可以睇吓日式 RPG 出晒名唔興用角色創建，而係比較傾向畀玩家扮演特定嘅角色，經歷一段有吸引力嘅故事。

廿一世紀起嘅遊戲，往往會畀玩家或多或少噉修改自己嘅化身，例如《俠盜獵車手：聖安地列斯》—雖然呢隻 gem1 有固定嘅角色做主角畀玩家操控，但玩家有權改變主角嘅髮型，又可以決定主角著咩衫。有啲 gem1 仲會更進一步，寫隻 gem1 嘅故仔嗰陣唔預設主角嘅特性，畀玩家用角色創建任意噉決定自己化身嘅性別、年紀、膚色、髮型、身高體重、種族以至職業等嘅唔同特性—呢種情況喺 MMORPG 當中最常見。

認同效應

睇埋：身份認同同玩家角色

研究表明，用家好多時都會將自己嘅化身設計到似自己，首先，研究者觀察用家設計化身。發現佢哋會要自己個化身吻合自身性別—得 4% 嘅女用家會用男嘅用家化身，而得 14% 嘅男用家會用女嘅用家化身。不過，亦有部份嘅用家硬係鍾意將自己嘅化身設計到唔似自己，想體驗唔同嘅身份認同，或者試吓彌補自己喺現實有嘅不足之處。呢種透過用家化身嚟探索自己身份認同嘅過程，被指能夠為用家帶嚟極大嘅享受感。

遊戲相關

• MMORPG
• 社會模擬
• 奇幻種族

睇埋

• 人機互動
• 虛擬世界
• 元宇宙

文獻

• McArthur, V., Teather, R. J., & Jenson, J. (2015, October). The avatar affordances framework: mapping affordances and design trends in character creation interfaces. In Proceedings of the 2015 annual symposium on Computer-Human Interaction in Play (pp. 231-240)，呢份人機互動文獻講到「用家化身創建介面要點樣設計」嘅問題。