前行政長官辦公室

舊英童學校又叫前行政長官辦公室，係香港一座三級歷史建築，位於香港島中環半山區堅尼地道28號，家下係前行政長官辦公室所在地。

建築物喺19世紀起好，係一座兩層高嘅維多利亞式獨立屋，曾經係英童學校嘅校舍。1990年代，座樓曾經俾中英聯合聯絡小組徵用作辦公室。香港主權移交後，座樓由本地設計師協會租用，成立香港設計中心，由香港賽馬會贊助古物修復同埋裝修費港幣600萬。

兩年後，香港設計中心喺2006年中搬咗去九龍九龍塘嘅香港工業科技中心，香港特區政府喺同年11月，經前任行政長官董建華同意，最後揀咗呢座樓作為前任行政長官辦公室。2007年 4月21號，政府宣佈座樓正式成為「前任行政長官辦公室」 ^[1]。政府使咗200幾萬港元進行裝修、買傢俬、做外牆髹油，以及喺大門外加上銅牌同埋豎立國旗同埋區旗。