南島語系

南島語系分佈圖

南島語系（英文：Austronesian languages）係世界上其中一個主要語系，包括大約1300種語言，主要由南島民族所使用嘅語言。主要分佈喺南太平洋群島，包括臺灣、海南島、越南南部、菲律賓、馬來群島，東達南太平洋東部嘅復活節島，西達東非洲外海嘅馬達加斯加島，南抵紐西蘭，跨越東南亞、東亞、非洲、大洋洲。夾埋超過3.5億人用。

主要分佈區域

所謂「南島」（Austronesia），係喺1899年由學者Wilhelm Schmidt由拉丁文字嘅字根「auster」同希臘文「nêsos」所合組而成，前者係南風噉解，後者係指島，所以日本人創造和製漢語「南島」嚟對應「Austronesia」，而中文喺近代沿用咗呢個譯名。

使用南島語系嘅區域包括臺灣、海南、菲律賓、馬來西亞、新加坡、印尼、馬達加斯加、新畿內亞、紐西蘭、夏威夷、密克羅尼西亞、美拉尼西亞、波利尼西亞等各地島嶼，加上馬來半島嘅馬來文、中南半島上嘅越南（古占婆領土）占語同埋泰國嘅莫肯語同埋莫克倫語。北起臺灣，南抵紐西蘭，西至馬達加斯加，東至智利復活節島。

南島語系分佈區域好大，語言數目亦好多，根據《民族語》世界語言資料庫資料，佢總數有1262種之多（Ethnologue: Languages of the World 2004）。 由於移民同近代帝國主義殖民，喺劃分為南島語系嘅區域入面，部分島上亦有使用非南島語族嘅語言。例如臺灣，除咗有隸屬於南島語族嘅原住民族族語以外，由於17同18世紀時，嚟自大明帝國、大清帝國嘅移民而同時存在住唔同漢語，包括閩南話（而家嘅臺灣話）同客家話（臺灣客家話）。台灣喺19世紀末至20世紀中期嘅台灣日治時期則以日文為官方語言；第二次世界大戰後時期，中華民國政府統一使用中華民國國語）。

其他國家，包括菲律賓相繼畀西班牙同美國統治、夏威夷畀美國統治、紐西蘭畀英國統治、印尼畀荷蘭統治、馬來西亞畀英國統治、越南同埋柬埔寨畀法國統治等，殖民地語言作為母語對依家嘅語言系統做成唔同程度影響。