史德拉海牛

史德拉海牛（Steller's Sea Cow），又叫大海牛或巨儒艮，係一種已經絕種嘅大型海洋哺乳動物。佢哋係海牛目中已知最大隻嘅品種，比起佢哋嘅近親海牛同儒艮都要大好多，而佢哋亦係生存至近代嘅海牛目當中，唯一適應寒冷氣候嘅物種。史德拉海牛響1741年白令海峽畀人發現，發現佢嘅人係博物學家喬治·史德拉，當時佢正同其他探險家維他斯·白令一齊旅行，而佢亦係已知唯一見過德拉海牛活體嘅生物學家。當時史德拉海牛嘅數目已經好少，主要生活嘅靠近司令群島（Commander Islands）嘅白令島同銅島（медний）嘅近海水域。

How to read a taxobox 史德拉海牛
史德拉海牛
瀕危指標
絕種  (1768年)
物種分類
界 動物界 Animalia 門 脊索動物門 Chordata 綱 哺乳綱 Mammalia 目 海牛目 Sirenia 科 儒艮科 Dugongidae 屬 無齒海牛屬 Hydrodamalis 種 大海牛 H. gigas
二元學名
Hydrodamalis gigas (Zimmermann, 1780)

命名

史德拉海牛響1741年時被發表為一個新物種，早響林奈提出學名格式嘅時間開始，只係知道27年後即宣告滅絕，已知無保留任何模式標本，因此曾經有好多學名被提出。現今採用嘅學名Hydrodamalis gigas，係由Zimmerman喺1780年時命名，而無齒海牛屬（Hydrodamalis）就由Retzius響1794年時確立。19世紀時曾經將史德拉海牛歸入Rytina屬。史德拉海牛另外重有兩個俗名，分別係borkèntier（德文）同埋kapustnik（俄文），前者意思係「似樹皮咁嘅皮膚」，後者嘅意思係「食甘藍嘅（cabbage eater）」。

外形特徵

1902年畫嘅大海牛群油畫

根據史德拉嘅記錄，史德拉海牛身長約7.5米，重4,500至5,900公斤，可以長到10.7米。史德拉海牛嘅前肢粗壯但短鈍，呈槳狀，尾巴嘅外型同儒艮好似。史德拉對佢哋嘅描述：「呢種動物從來唔游近沙灘，一直棲息喺水裏面，皮膚又黑又厚，好似橡樹皮咁，按身體各部分嘅比例，個頭好細。無牙，嘴裏面只有兩片又平又白嘅骨頭，一個喺上頜，一個喺下頜。」除咗無牙之外，史德拉海牛嘅另一項特點在於前肢末端得腕骨同掌骨，趾骨退化至幾乎完全消失，呢點同海牛或儒艮唔相似。

分布

史德拉海牛骨

史德拉海牛首次被人類發現時，分布範圍大致位於白令海嘅司令群島周圍，往東達阿留申群島西側，往西至堪察加半島。由上新世（Pliocene）同更新世（Pleistocene）嘅化石發現記錄研判，過去大海牛嘅分布範圍可能廣達整個北太平洋中北部海岸地帶，東側達下加利福尼亞半島同而家墨西哥西岸約北緯30度處，西部就去到日本嘅本州（南限約北緯37度）。

生活習性

史德拉海牛食喺岩岸邊生長嘅多種大型海藻，僅取食柔軟部分，據講當時每次史德拉海牛食咗海帶之後，海帶嘅莖同根就會被沖到岸上。而佢哋亦係海牛目中唯一食藻類嘅動物，不過有時都會食海草，但呢種講法仍然有爭議。似乎唔識潛水，至少食嘢嗰陣佢哋只將部分身軀埋落水度，響岸邊食潮線附近接近海面啲大型藻類，估計覓食深度唔超過1米深。史德拉嘅記錄中亦提到佢哋會「集體進食，個仔會被圍響群體中央受保護。」史德拉海牛內外都有寄生蟲，皮膚上有幾種甲殼動物寄生。天敵可能包括殺人鯨同其他大型鯊魚。

由於史德拉海牛唔怕人類，加上活動範圍接近岸邊，游得又慢，所以好容易捕捉。史德拉描述佢哋「從來唔叫，即使受傷都係咁」，不過群體間係咪有呢種以叫聲溝通嘅情形就唔知。當有同伴受傷，其他史德拉海牛會試圖加以拯救，根據獵人嘅講法佢哋會嘗試拔出受傷同伴身上嘅魚叉。

生殖

關於大海牛嘅文獻記錄中，曾經提到有1隻史德拉海牛乸被捕殺後拖上陸地嗰陣，另1條同佢同行嘅史德拉海牛公就喺岸邊停留唔肯走，至少維持兩日以上。加上其他群體觀察記錄，研判史德拉海牛可能係1夫1妻制，配偶關係可能會維持相當長嘅時間。史德拉留低嘅記錄重提到，史德拉海牛多數喺早春時交配，懷孕期係1年以上，年年生得仔，不過秋天係分娩嘅高峰期。事實上史德拉喺白令島停留嘅時間由1741年11月底至1742年8月，由時間上睇嚟佢可能從未親眼睇過史德拉海牛BB仔。

點解絕種

當史德拉第一次描述呢種海牛時，佢哋嘅族群經已好少，分布地區好有限，數量得番1,000至2,000隻。響人類發現佢哋之後無耐，白令海地區嚟咗好多獵人，呢啲人嘅目標就係捕殺生存響當地嘅海獺同北方海狗以獲取毛皮，而為咗補給需求而造成史德拉海牛嘅悲劇。呢啲人大量捕殺史德拉海牛，食佢哋嘅肉、用佢哋嘅皮嚟造船同修補船。已知1768年響白令島捉咗最後1隻，距離史德拉發現佢哋嘅時間只係得27年。部分學者認為，海獺嘅減少亦可能係大海牛絕種嘅原因之一，響其他生活響白令海嘅動物當中，海獺可能係同佢哋關係最密切嘅海洋哺乳動物，因為海獺會捉食海藻嘅海膽醫肚，如果由得海膽漫無止境咁生長，好快海藻林就會食晒。因此當時海獺嘅減少可能會令海牛帶嚟食物短缺嘅壓力。

喺白令海地區有時會聽到一啲消息，話見到好似海牛嘅動物，所以有啲學者提出，史德拉海牛嘅小群體可能一直活到而家，無絕種到，但呢種睇法目前並無科學證據。

參考

1. Pieter A. Folken, Randall R. Reeves, etc. / illustrated by Pieter A. Folkens, 《Guide to MARINE MAMMALS of the World》,Alfred A. Knopf, 2002: p476. ISBN 0-375-41141-0
2. Ronald M. Nowak, 《Walker's MARINE MAMMALS of the World》, The Johns University Press, 2003: p 214-215. ISBN 0-8018-7343-6
3. Paul K. Anderson and Daryl P. Damning, 《Steller's Sea Cow (Hydrodamalis gigas)》, edit by William F. Perrin, Bernd Würsig, etc. 《Encyclopedia of marine mammals》, Academic Press, 2002: p1178-1181. ISBN 0-12-551340-2