四嘅禁忌

四嘅禁忌係喺漢字文化圈嘅大中華地區、日本、朝鮮半島出現嘅現象，指基於對「四」呢個數字嘅迷信，而厭惡、排斥、迴避帶「四」嘅嘢。

中國上海一座住宅嘅𨋢，可見冇咗4、13、14樓…

原因

	讀音
	四	死
官話	sì	sǐ
吳語	sy2	sy2,shi2
粵語	sei3	sei2
越南話	tứ	tử
閩南話	sì,sù	sí,sú
日文	shi	shi
韓文	sa	sa

漢字文化圈對「四」字嘅係源於佢嘅發音容易令人聯想到死，因為喺漢語嘅大部份方言，「四」字同「死」字嘅發音只有聲調上嘅分別。而喺日文同韓文嘅漢字讀音冇聲調，令「四」同「死」兩個字嘅發音完全一樣。所以一路以嚟「四」呢個數字俾人覺得唔老黎，並喺一啲敏感場合中刻意迴避。

喺粵語當中，14同24比起單一個4字更加唔好意頭，因為14嘅讀音似「實死」，而24嘅讀音似「易死」。

重有，54唔算唔好意頭，因為讀音似「唔死」。04都係「零舍」嘅諧音。

現象

最常見嘅一個迴避措施係跳咗含有「4」嘅數字。喺嗰啲地區，尾數係「4」嘅樓層不時被跳過，例如將實際嘅4樓編為5樓，即係3樓上一層就係5樓。見證生死嘅醫院對呢種禁忌尤為敏感，樓層、看診序號同病房冧巴都盡可能避開「4」字，呢種現象喺𨋢裏面最易見到。喺香港，原本並無話跳樓數，地產商爲咗賣得好啲，就將樓數改咗。一啲住宅樓連40至49樓都跳晒，即係39樓上一層就係50樓，好似凱旋門、萬景峯等。但亦有人認為「消失嘅樓層」反而帶來另一種恐怖感，所以亦有措施係用拉丁字母「F」來代替「4」（「F」係「4」嘅英文「Four」第一個字母），有啲就改以「3A」呢種附屬標記形式來代替。某啲東西方文化融匯嘅地方，好似香港同新加坡，某啲建築物可能隨時會有13、14同第啲有4嘅樓層全部唔見晒嘅現象。

除咗樓層之外，喺台灣有好多餐廳、飯店問客人幾多位，會巧妙咁略過「四（位）」，改稱「3+1（位）」。喺一啲地區，車牌冧巴都開始跳過「4」，例如台灣同海口。中國軍用飛機型號往往以5開始計亦係為咗避開4（好似殲-5），台灣同韓國海軍艦艇嘅冧巴都係冇4字。韓國國鐵機車冧巴冇4444號。香港嘅渡輪公司都冇以「4」為冧巴嘅船，例如新渡輪「新輪84」同埋愉景灣航運「Discovery Bay 4」等。

芬蘭通訊設備廠商諾基亞公司都有呢一點考慮（亞洲係佢嘅主要市場）而唔出有4字嘅手機型號，只有3410同埋Series 40系統平台等極少數例外。

不過基於宣揚科學文明嘅意識型態或實務上嘅技術問題等原因，好多時編冧巴都係跳唔過「4」字，例如地址、車牌、電話冧巴等等。喺呢種情況下，有「4」嘅冧巴有時會俾用戶主動迴避、無人用。因此有電信公司會提供優惠畀自願用呢啲冧巴嘅用戶，以免冧巴唔夠分；而喺房地產上，4樓有時變成同一建築物中市場價值較低嘅樓層，又或者業主唔想低價賣出而將佢出租，衍生4樓住戶搬遷率較高嘅現象。

反例子

對「四」嘅避忌並唔係絕對，實際上有好多唔避忌嘅例子或者反例。

傳統文化

古時中國人認為雙數代表吉祥，而四屬於雙數，因此並唔代表凶兆。另外喺道教文化中，「四」代表四象，有圓滿之意。又好似年分四季，地分四方，城市有四郊，蓋房要四至。送禮應該送四、六或八樣，婚嫁應該送四彩禮，以示吉祥。風水上「四」代表四綠文昌星，有利學生和文職工作者。

現時亦有繼承四字稱號，有四大天王、四大金剛、四大美人等。

現代文化

喺西方音樂領域中，第四階嘅唱名係Fa，普通話讀音係「發」。

第啲反例子包括棒球打者中嘅第四棒。因為喺棒球戰術需要下，第四棒通常由隊中最擅於長打嘅人擔任，即係該隊嘅打擊王牌，所以第四棒嘅位置係棒球打者追求嘅榮耀之一。

喺冰壺比賽，最後一個出場嘅選手叫做「四壘」，係隊中王牌。例如中國女子冰壺隊嘅王冰玉。

國際籃球比賽或職業籃球比賽以外嘅籃球賽中，波衫冧巴一般都冇一至三號，而係由四號開始，而喺不成文規定下，四號都係作為球隊隊長。

打麻雀更係離唔開「四」字，一啲高難度糊牌型個名都帶有「四」字，好似大四喜、四槓子、四暗刻等；由於佢哋都係好多番，故此就算個名有「四」字，唔少雀友都想甚至渴望食到呢種牌型。

西方

西方世界稱東方呢一種禁忌為「四恐懼症」（Tetraphobia），係「Tetra」（四）同「Phobia」（恐懼症）合成。不過呢種禁忌並唔似得恐懼症係一種精神疾病，而係一種迷信，係文化同教育下嘅結果。

喺意大利一啲地區對4字亦有所避忌，因為4可以代表吉嘅棺材，會帶嚟惡運。

睇埋

• 十三恐懼症
• 六六六恐懼症