在港加拿大人

在港加拿大人係喺香港住嘅加拿大人, 並包括唔同種族嘅人。跟在港美國人相似, 好多都係因為返工嘅緣故而喺香港。

2011年由亞太基金會同香港浸會大學嘅研究顯示, 香港有大約29萬位加拿大人, 人口仲多過加拿大嘅愛德華王子島省差唔多一倍。喺呢29萬人之中, 大部分都係華人, 而接近85%係喺香港出世嘅, 比例仲高過喺加拿大住嘅香港裔加拿大人嘅80.2%。^[1] 呢度係加拿大人第三大聚居嘅地方, 只有加拿大自己同埋美國嘅加拿大人人口高過香港。

香港政府並唔接受雙重國籍, 所以好多原本喺香港大嘅加拿大公民都唔受承認, 而政府統計入面只有16,000位加拿大公民喺香港。相反, 加拿大駐港總領事館承認雙重國籍, 而佢哋嘅統計係大約30萬人。^[2]

外交事務

加拿大主要通過加拿大駐港總領事館去為香港嘅加拿大公民提供服務。

香港加拿大國際學校為香港嘅加拿大人提供教育服務。

香港有幾個地方都係以加拿大人嚟起名, 包括:

九龍東軍營 - 原本叫做“奧士本軍營”, 為加拿大戰士莊·羅拔·奧士邦而改名, 嚟紀念佢為保衛香港而作出嘅無私奉獻。 ^[3] 香港公園亦都有紀念佢嘅雕像。
調景嶺 - 以前叫做 "Rennie's Mill", 為加拿大商人 Alfred Herbert Rennie 而起名。
麥花臣場館、麥花臣匯、麥花臣遊樂場 - 為加拿大傳教士麥花臣 (John Livingstone McPherson) 而起名, 紀念佢為喺香港創辦基督教青年會 (YMCA) 嘅貢獻。^[4]