亞媽

  「媽媽」跳轉到呢度。想搵2017年美國電影，請睇「媽媽！」。

  想搵第二個意思嘅話，請睇亞媽 (搞清楚)。

亞媽／阿媽／呀媽，仔女稱呼生佢嘅女人，亦即係生仔女嘅女人，亦即生母。有時養育仔女嘅女人，都叫亞媽，亦即養母。亞媽叫法非常之多，主要有媽，其次有母，兩者上古應同源。母字非常古老，而媽係唐宋時起嘅表音字。重有個娘字，都有亞媽之意。書面多數寫母親，一般唔會用來稱呼。現今又興叫老婆老公嘅亞媽做亞媽。

媽字系有媽、媽媽（粵拼：maa1*4 maa1）、老媽子、媽子、老媽媽、「孖打」、「媽打」。母字系有老母（文讀：lou5 mou5；白讀：lou5 mou5*2）、家母，區別用法有生母、養母、代母、後母、繼母，其他類似亞媽，如伯母、嬸母、亞母，都係母字旁及。娘，現今較少用來叫亞媽，鄉音或者有，文學有用娘同娘親，其他類似亞媽，如伯娘、三娘嘅，有時娘要升調。

香港受英文影響，英文亞媽叫mother，所以有人就叫媽打。英文變體mummy，變體mum、mammy或者mommy，亦變成媽咪（粵拼：maa1 mi4）呢個叫法。

亞媽個「亞」，係冇歧異嘅廣東話起首音寫法。古代慣以阿字寫起首音，然而其嘅廣東音已演化「粵拼：o1」，如喺「阿彌陀佛」、「阿膠」入面嘅噉。近世受北方話影響，亦有人寫「阿」，故「阿媽」變返常見。

來源

唔理係媽定係母（古代媽同母都係ma），都好可能係蘇蝦學出聲嘅頭嗰幾種聲。因為咁就畀大人當係叫阿媽嘅。爸（pa），爹（te）都係有異曲同工之妙。所以有啲話同廣東話唔同，阿爸阿媽會掉轉來叫。

定義

阿媽係雌性，係仔女對由肚裏面生佢哋出嚟嘅人嘅稱呼。不過有時候，就算唔係由呢個人親自生出嚟，但係呢個人獻出咗養育之恩，咁被佢養育嘅人都可以叫佢做媽媽。

如果親生阿媽離咗世或者離咗婚而唔再同爸爸一齊，但係爸爸就娶咗另一個女人，咁呢個女人就會成為啲仔女嘅「繼母」（俗稱「後母」或者「後底乸」）。

母愛

母愛係指阿媽對子女嘅愛。所以話阿媽係最偉大嘅人亦絕大部份嘅人都會贊同，因為除咗以上講嘅之外，有啲媽媽為咗仔女，重會不惜犧牲自己，甚至獻出性命嚟作出保護；以上呢啲行為就稱之為「母愛」。

有好多電視或者電影都會用母愛嚟做橋段，就好似香港有一套同系列嘅電影，佢哋分別係喺1985年出品嘅《法外情》、1988年嘅《法內情》同埋1989年嘅《法內情大結局》，呢系列嘅戲充份咁刻劃出媽媽對個仔無私嘅愛，係十分之感人肺腑嘅經典電影。套戲係由葉德嫻飾演阿媽，而劉德華就飾演做律師嘅仔。

另外，美國人安娜查維斯兩母女，一直咁推崇阿媽對仔女嘅母愛，要定下母親節。個女響阿媽死咗之後兩年，就將1907年5月12號佢阿媽死忌做母親節。最後美國1914年開始將每年5月第二個星期日定為「母親節」。而呢個習俗就推廣到世界各地。

另類用法

人類對於一個有感情嘅地方或者有感情嘅事物，甚至敬拜嘅神靈等等，都可以用母親嘅名號嚟稱呼，好似：

• 母地：即係家鄉（英文係 Motherland），存在咗孕育之恩嘅情感。
• 聖母瑪莉亞：天主教及基督教嘅聖經入面講，經聖靈欽點而生出神之子耶穌（Jesus Christ）嘅女人。因為天主教徒信佢係由古到今唯一完全冇原罪嘅人，於是成為咗世人之母。
• 皇母娘娘：又叫天后娘娘，道教裏面嘅神靈，係喺天界上面玉皇大帝身邊嘅皇后。
• 母校：即係就讀過嘅學校。
• 母會：通常係用嚟講運動員出身嘅屬會。
• 母公司：通常係指總公司。
• 外母或外母毑：話係另類係因為佢唔屬於一個人本身嘅直系親屬，亦都冇養育之恩，但係又好有親戚關係；佢就係一個男人對佢老婆嘅阿媽嘅稱呼。至於一個男人對佢嘅外母有冇感情就好個別，冇得深入討論；但係根據「愛屋及烏」嘅道理，唯有計佢係有感情嘅對象。
• 風月場所入面負責管其他女職員嘅，叫媽媽生（粵拼：maa1 maa1*4 saang1*4）或「媽咪」（粵拼：maa1 mi4）。

做錯嘢或者見到啲嘢而驚嘆、或者感嘆話覺得唔抵、唔忿氣，好多時會搬阿媽出嚟作為感嘆。例如以標準官話做母語嘅中國北方人好興喺感嘆時大叫：「我的媽呀！」或者「媽的！」，又或者可以睇睇意大利文入邊嘅 mamma mia!（大致似粵語：媽媽咪mi1呀！）—字面解都係指「我阿媽呀！」嘅意思，都係用嚟喺感嘆或者受挫折嗰陣嗌嘅。

各種語言嘅粗口，包括粵語粗口，都好興搬人哋阿媽出嚟鬧同侮辱，好似屌你老母。

形容粗俗嘅鬧交或埋怨，尤其是用到以上用語時，會講媽媽聲。

水母（又叫「白蚱」）並唔屬於阿媽呢個欄目嘅，而係一種無脊椎嘅水中軟體生物。

睇埋

• 母語
• 依附
• 後抵乸