建造經營模擬遊戲

建造經營模擬遊戲（英文：construction and management simulation）係模擬遊戲嘅一種，源於 1980 年代尾。

一隻城市建造遊戲嘅遊戲截圖；圖入面見到玩家建造嘅城市，仲有多個視窗俾玩家睇到個城市嘅狀態（例如係入息）。

建造經營模擬遊戲泛指要求玩家喺有限嘅資源之下建造、擴充或者管理架空嘅團體，即係模擬做某啲團體嘅管理者，當中「團體」可以係指一個政府（政治模擬遊戲）、一間企業（商業模擬遊戲）以至一個城市（城市建造遊戲）... 呀噉。

分類

睇埋：模擬遊戲

建造經營模擬遊戲可以分以下幾種：

• 政治模擬遊戲（political simulation game / government simulation game）：模擬部份或者成個國家嘅政治系統，有時仲會模擬埋國際政治同地緣政治；喺呢啲遊戲當中，玩家一般會扮演一個（架空或者現實）國家嘅領導人或者國家意志，並且透過具體嘅政治系統（法律、制度、政策同條令等等）嚟掌控就業、教育同財富分配等嘅事務；政治模擬遊戲成日俾人話同戰略遊戲好相似，而遊戲設計界一般用「有冇打仗嘅內容」嚟分別呢兩種遊戲類型－相對於大多數嘅戰略遊戲，政治模擬遊戲多數唔多睇重軍事相關嘅嘢，就算模擬埋軍事嘅嘢都唔會涉及戰術（即係唔會要玩家實際控制上戰場嘅單位），甚至乎係成隻遊戲根本冇打仗嘅內容。不過，政治模擬遊戲同大戰略遊戲有相當大嘅重合。政治模擬遊戲嘅經典作品有《地緣政治模擬系列》（Geopolitical Simulator）同《超級大國》（SuperPower）。
• 商業模擬遊戲（business simulation game / tycoon game）：模擬俾玩家管理經濟（主要係微觀經濟）同金融系統嘅遊戲；喺呢啲遊戲當中，玩家會負責經營或者係扮演一間企業，向啲客提供貨品或者服務，並且務求做到從中賺取利潤得嚟又要佔領個市場、擴大企業規模或者產業升級。商業模擬遊戲比較出名嘅例子有《金融帝國》（Capitalism）同埋相關嘅遊戲，又或者可以睇吓出嗮名俾玩家模擬管理一座遊樂園嘅《模擬樂園系列》（RollerCoaster Tycoon）。
• 城市建造遊戲（city-building game）：顧名思義模擬俾玩家建造城市同埋做城市規劃嘅工作；喺呢啲遊戲入面，玩家通常係扮演一個城市嘅市長，要負責規劃、建造同管理個城市啲交通、水電以及城市服務等嘅各種基建，仲要制定城市嘅政策、開發資源、找平收支同抵禦災難等等。城市建造遊戲出名嘅例子有《模擬城市系列》（SimCity）同埋《城市：天際線》（Cities: Skylines）呀噉，當中《城市：天際線》用咗當時算係相當先進嘅交通模擬技術嚟令到虛擬城市嘅交通極度真實，甚至仲有科學家想攞佢哋啲技術嚟做學術性嘅城市規劃研究。

... 等等。

例子

• 《地緣政治模擬系列》（Geopolitical Simulator）
• 《超級大國》（SuperPower）
• 《金融帝國》（Capitalism）
• 《模擬樂園系列》（RollerCoaster Tycoon）
• 《模擬城市系列》（SimCity）
• 《城市：天際線》（Cities: Skylines）
• 《異星工廠》（Factorio）
• 《異形工廠》（shapez.io）

睇埋

• 戰略遊戲
• 電子遊戲類型一覽
• 管理學同工商管理