開主選單
1921年成珠小鳳餅嘅廣告
而家成珠餅家舖面

成珠樓廣州河南漱珠橋畔漱珠東市5號[1]海珠區南華中路180、209號[註 1]),係乾隆十一年(1746年)開張嘅一間茶樓,亦係雞仔餅嘅發源地[2]。招牌嘢食有成珠小鳳餅、奇味金豬手[3]同創新伍仁月。

1985年10月9號,成珠樓火燭燒通頂;第年重建,改名成珠酒家2002年,東江集團買落,改名鴻星海鮮酒家[4]2006年3月1號停業無耐拆咗[5]。由民國後期到佢拆之前[註 2],都重係廣州尚存嘅最耐歷史嘅茶樓[2][3]

目錄

1746年,茶樓開張,初時叫成珠館[4][6],係簡易平房。道光年間,怡和行行商伍紫垣買落,之後有小鳳餅嘅古仔[註 3][4]咸豐年間改建成兩層嘅木結構茶樓[7]。19世紀中後期轉手吳氏,改名「成珠餅家」,兼做茶樓[4][8]光緒年间,梁福和堂買落,改名「成珠樓」,兼營茶市、飯市、餅市,茶樓有新嘅發展[2][7]

1928年,政府開路將成珠樓「腰斬」成兩橛[8]。同年,成珠樓改成鋼筋混凝土結構,佔地600平方米[4]1938年,日軍攻入廣州,廣州淪陷,成珠樓歇業[5]1940年重新開張[5]1946年,開業200週年慶典,轟動河南。書法家麥華三寫咗首《成珠樓》詩[4]

小鳳餅,成珠樓,二百年來譽廣州。
酥脆甘香何所从,品茶細嚼似珍饈。
成珠高閣會天孫,綠皚新醅酒令傳。
醉傲天臺左右顧,漱珠橋畔海幢園。

1947年,開三間分店,亦即西關分店、成珠餅家、澳門分店[4]1956年,因為搞「公私合營」,梁氏退出成珠樓[6]1956年之後,政府投資將成珠樓右側嘅平房擴建成四層樓,營業面積擴大到1400平方米,職工人數超過150個[9]1959年,成珠樓小鳳餅嘅製作配方向社會公開,被收入《中國名菜譜》[4]

1985年10月9號,成珠樓無情情火燭,由晚黑七點五十分到九點四十七分,足足燒咗兩個鐘。嗰晚,有幾對新郎新娘響呢處擺酒。晚黑七點半,啲人逐漸散場,重剩返一對新郎、新娘陪啲姨媽姑姐食飯傾偈。約莫七點五十分,成珠樓入邊突然響咗幾嘢之後,樓下有人大嗌「火燭嘞」。無耐,底層通到二層嘅木樓梯燒着,唯一嘅通道被大火塞住,三、四層嘅顧客同茶樓員工無路走,於是一啲沿住樓外邊嘅水管向下爬落地面,有啲就跳樓。喺起火之後15分鐘,先有人報警,廣州消防支隊先後派咗19駕消防車、2駕消防艇、140幾個消防員。當晚九點四十七分,大火卒之撲熄。呢場事故令到4層磚結構嘅成珠樓燒嗮、8人死亡(包括一個新娘)、24人受傷,直接經濟損失五十四萬元人民幣[10]。之後查明事故係照明電錶互感裝置嘅設計唔合理、出線接線柱短路造成[10]1989年,政府籌劃喺原址重建[6]。成珠樓自此結束咗240年嘅歷史[7]

1990年1月23號[9],茶樓開張,改名「成珠酒家」,佔地面積擴大到1400平方米[3];開咗南華東路分店、荔福路分店[4]、赤崗分店[3]1996年後,生意開始冷淡[6]2000年因為債務問題喺9月停業[7]

2002年,東江集團買落成珠樓嘅經營場地,但係無買佢招牌,開成「鴻星海鮮酒家」,街坊都重叫「成珠樓」[8]2006年3月1號「鴻星海鮮酒家」執笠要拆[5][7]。而家剩低馬路斜對面嘅成珠餅家重賣緊「成珠小鳳餅」同「創新伍仁月」[6]

招牌嘢食

成珠小鳳餅

內文: 成珠小鳳餅

成珠小鳳餅創製於清朝,係各式雞仔餅嘅始祖,由欖仁瓜子仁芝麻仁白砂糖熟糯米粉整成。

1931年,成珠小鳳餅獲廣州市國貨展覽會一等獎章。「公私合營」浪潮之後,成珠小鳳餅嘅製作配方喺1959年公開,編入中國商業部飲食服務局主修嘅《中國名菜譜》[4]。1997年獲中國烹飪協會頒「中華名小食」。

新伍仁月餅

成珠樓嘅月餅有豆沙月豆蓉月蓮蓉月伍仁月。1998年,成珠樓喺伍仁月餅餡落夏威夷果,咁就創製出新伍仁月餅,亦廣受食客歡迎[11]。而家成珠餅家賣嘅中秋月餅有兩隻伍仁月,亦即傳統伍仁月同創新伍仁月,前後者之別,就係後者落咗夏威夷果仁、美國杏仁、腰果仁松子仁同南瓜子仁。

龍鳳禮餅

成珠樓嘅餅食除咗小鳳餅同月餅,重有龍鳳禮餅。龍鳳禮餅亦叫嫁女餅,包括豆沙餡嘅紅菱酥、豆蓉餡嘅黃菱酥、伍仁餡嘅白菱酥、蓮蓉酥皮蛋酥蠔豉酥[9][11]

  1. 南華中路180號係1930年開馬路之後嘅成珠樓;209號即而家成珠餅家[1]
  2. 乾隆二年(1737年)開設嘅太昌茶樓結業(1931年)計起,到2006年。
  3. 亦有話係梁氏接手嗰時嘅事。

  1. 1.0 1.1 "#成珠樓# 創始於1745年......". @省城風物 (用中文寫). 新浪微博. 2016年9月1號. 喺2017年8月28號搵到. "1930年,市政府開闢南華馬路,按線路規劃,將長方形的成珠樓斬爲两段......所剩馬路北面部分,即至今尚在營業的成珠餅家。"
  2. 2.0 2.1 2.2 "廣州最老的茶樓,「雞仔餅」的發源地". 新快報. 和訊. 2014年6月7號. 喺2017年8月29號搵到. 
  3. 3.0 3.1 3.2 3.3 程慧 等, 編 (1999). 廣州觀光大全. 廣州: 廣東人民出版社. 第 408,453頁. 
  4. 4.0 4.1 4.2 4.3 4.4 4.5 4.6 4.7 4.8 4.9 陳建華 等, 編 (2008). 廣州市文物普查彙編·海珠區卷. 廣州: 廣州出版社. 第 411頁. ISBN 978-7-80731-659-6. 
  5. 5.0 5.1 5.2 5.3 "260歲成珠樓要拆了! 馳名小鳳餅將賣下去". 廣州日報. 南方網. 2006年3月3號. 喺2015年8月13號搵到. 
  6. 6.0 6.1 6.2 6.3 6.4 "成珠樓:浴火小鳳,艱難重生". 南方都市報. 2013年7月10號. 喺2015年8月13號搵到. 
  7. 7.0 7.1 7.2 7.3 7.4 "老廣州人惋惜拆了「成珠樓」". 信息時報. 新浪新聞. 2006年3月4號. 喺2017年8月29號搵到. 
  8. 8.0 8.1 8.2 "嶺南往事:成珠樓「小鳳餅」帶旺一方". 廣州日報. 廣東文化網. 2012年5月7號. 喺2017年8月29號搵到. 
  9. 9.0 9.1 9.2 黃曦暉, 編 (2008年9月16號). "食在廣州史話 第四十一輯:成珠茶樓滄桑史". 廣東科技出版社. 
  10. 10.0 10.1 "廣州成珠茶樓火災". 中國百科網. 喺2015年8月12號搵到. 
  11. 11.0 11.1 龔伯洪 等, 編 (2013). 百年老店 廣州老食肆與老食語. 廣州: 廣東科技出版社. 第 30–34頁. ISBN 9787535957450.