背景設定

背景設定bui3 ging2 cit3 ding6（英文：settingset1 ting4）喺敘事學上係指一個故仔所發生嘅時間同地點，係故仔嘅基本組成元素之一。背景設定可以係真實嘅，但又可以係虛構嘅：有好多故仔都係設喺貼近現實嘅世界，但又有好多故仔設喺架空世界當中。例如：

• 哈利波特（Harry Potter）係一個相當出名嘅奇幻故仔，背景設定係一個架空版本嘅廿世紀尾英國（基本上似廿世紀尾嘅英國，但就係一個有魔法嘅世界）－係一個局部架空嘅背景設定；又例如
• 奇幻故仔冰與火之歌（A Song of Ice and Fire），冰與火之歌舞台主要設於維斯特絡（Westeros）呢個虛構嘅大陸（作者有為維斯特絡畫咗多幅地圖），喺呢個特殊嘅世界當中，一個季節閒閒地可以維持成幾年噉耐嘅時間，而個故仔開始嗰陣啱啱係維持咗近乎十年嘅夏天就嚟結束，維斯特絡以北嘅地方長年積雪，而且有某啲得人驚嘅類人生物喺嗰度，等緊冬天來臨嘅機會侵略維斯特絡。

虛構大陸阿里迪亞（Aredia）嘅地圖；對背景設定嘅思考喺科幻同奇幻嘅寫作上零舍重要。

架空世界係某啲文類嘅重點，例如哈利波特係一個相當出名嘅奇幻故仔，背景設定係一個架空版本嘅廿世紀尾英國（基本上似廿世紀尾嘅英國，但就係一個有魔法嘅世界）。背景設定喺一個故仔當中扮演咗重要嘅作用：背景設定幫讀者觀眾理解個故仔所發生嘅時空嘅物理性質、自然環境、社會文化、個世界嘅歷史、以及有啲乜重要地點呀噉，間接為「每個角色可以採取乜行動」設下一啲界限，例：喺一個設定咗為冇魔法嘅故仔世界當中，作者唔可以講個主角用咒語解決困難；而且背景設定仲要同角色（character）等其他敘事元素互動－角色行動所引致嘅大事可能會影響背景設定（例如主角同邪惡大魔王之間嘅大戰會對故仔世界造成破壞），而背景設定又會影響角色（例如故仔世界嘅文化影響主角嘅成長，所以會形塑佢哋嘅性格）。

基本要素

背景設定有以下嘅組成元素：

• 地點（「呢個故仔發生喺英國」）；
• 時期（「呢個故仔發生喺維多利亞時代嘅英國」）；同埋
• 同情節主要部份有關嘅背景衝突（「呢個故仔發生喺維多利亞時代嘅英國，英國同俄羅斯帝國嘅關係日益緊張」）。

世界創建

内文：世界創建

喺敘事學上，世界創建（worldbuilding）指透過故仔描繪一個虛擬世界嘅過程，喺科幻同奇幻等興將角色置身喺架空世界嘅文學體裁當中零舍重要。作故仔嘅人要思考個故仔嘅世界嘅物理法則係點（等個故仔雖然有魔法呢啲超自然元素，但依然有理可循）、自然環境係點（奇幻故仔嘅作者好多時仲會幫自己個架空世界畫地圖，例子有魔戒）、社會文化係點（例：同現實世界比起嚟，有冇乜唔尋常嘅傳統習俗或者價值觀）、歷史（例：「500 年前，高扁族同精靈族曾經打過一場大仗，雙方死傷慘重，從此兩族誓不兩立，到咗今日都仲係噉」）、以及有乜特色地點（例：霍格華茲魔法學校係一間歷史悠久嘅魔法學校，係哈利仔要去返學嘅地方）。喺做完世界創建之後，作者仲要諗計有技巧噉將呢啲資訊傳達俾讀者知（而唔係直接講），透過角色嘅言行同背景事物等向讀者透露個故仔世界發生過嘅事（例：哈利波特嘅多位配角一講到佛地魔就聞之色變，佢哋嘅恐懼情緒令讀者知道，佛地魔呢個角色同哈利波特世界一啲好得人驚嘅歷史有關）。

霍格華茲魔法學校嘅模型；做得好嘅世界創建能夠造出讀者嚮往嘅虛構世界，令個故仔更加引人入勝。

睇埋

• 敘事元素
• 角色
• 情節
• 虛構世界

文獻

• Levin, Donna (1992), Get That Novel Started, Cincinnati, OH: Writer's Digest Books, ISBN 0-89879-517-6.
• Lodge, David (1992), The Art of Fiction, London: Martin, Secker & Warburg Ltd, ISBN 0-14-017492-3.
• Obstfeld, Raymond (2002), Fiction First Aid: Instant Remedies for Novels, Stories and Scripts, Cincinnati, OH: Writer's Digest Books, ISBN 1-58297-117-X.
• Roberts, Edgar V.; Zweig, Robert (2014), Literature: An Introduction to Reading and Writing, Pearson, ISBN 9780321944788.
• Rozelle, Ron (2005). Write Great Fiction: Description & Setting. Cincinnati, OH: Writer's Digest Books. ISBN 1-58297-327-X.
• Truby, John (2007), Anatomy of a Story: 22 Steps to Becoming a Master Storyteller, New York, NY: Faber and Faber, Inc, ISBN 978-0-86547-951-7.

拎

• Settings. TV Tropes.