李鄭屋漢墓博物館

李鄭屋漢墓博物館喺香港九龍深水埗，係香港歷史博物館五間分館之一，由康樂及文化事務署管理，當中嘅建築屬於香港法定古蹟。

歷史

1955年喺李鄭屋邨發現嘅漢墓

1955年8月，香港政府為咗應付市民對公共房屋嘅需求，計劃響李鄭屋村起徙置大廈。當建築工人喺8月9號進行夷平山坡時，無意發現咗一個東漢墓穴。香港大學中文系系主任林仰山教授（Frederick Sequier Drake，1892－1974）於是帶學生前往研究發掘。據當年嘅老街坊回憶，響漢墓正式出土前，曾經有建築工人用外衣包住古物運離現場（睇1955年8月11號《星島日報》）。參考咗林仰山等考古學家評估後，市政局加建咗鋼筋水泥硬殼，以保護漢墓免受風雨侵蝕。漢墓響1957年由市政局接管及開放畀公眾參觀，墓裏面嘅出土文物都陳列響漢墓旁嘅展覽館內。1988年12月，李鄭屋漢墓被列為香港法定古蹟。

由2005年1月起，為紀念漢墓出土50週年，康樂及文化事務署進行一系列嘅復修工程，包括響墓室頂部加建一個用鐵氟龍物料製成嘅天幕，防止雨水造成嘅滲漏，減低被侵蝕嘅機會，耗資達100萬港元。墓室過去都冇採取過任何措施去保護佢，響1970年代香港嘅教科書所見，當時嘅墓室外圍亦只係一個生滿草嘅小山坡。直到1990年代後期，前市政局先至響外面加建保護設施，並響墓內裝設控制濕度嘅裝置。今日漢墓嘅墓室並唔對外開放，但係市民可以透過墓室門嘅玻璃，一睹呢個建於東漢時期嘅墓穴。

地理

根據考古學家響發掘古墓時嘅周圍環境推斷，漢墓起嗰時佢係響海邊，但而家博物館所在嘅山腳處已離開海岸非常遠。即使扣除歷年因填海而增加嘅土地，亦可以察覺到從東漢到清末嘅1800年間，從珠江帶來嘅沙泥沉積落嚟嘅結果。

建築

李鄭屋漢墓博物館外貌

李鄭屋漢墓

根據考古學家推斷，個墓喺東漢時期起。而喺漢墓出土咗67件文物，當中包括最少33件完整文物，例如屋舍模型同各種陶器同青銅器等。但係，漢墓裏頭冇發現任何骸骨。

漢墓嘅佈局為「十」字形，一共有四個墓室。墓室屬磚室墓，由長40厘米、闊20厘米同厚5厘米嘅磚塊砌成，而磚塊刻有10幾種花紋同文字「大吉番禺」，但室入口道響出土前已受到破壞。

至於個墓嘅主人，有人話係鹽官，亦有意見話係避亂嘅貴族。

展覽

漢墓而家已成為康樂及文化事務署嘅一間博物館。由於需要穩定漢墓裏面嘅溫度同濕度，墓室並唔對外開放，但參觀者可透過裝嵌響羨道門口嘅玻璃牆窺探墓室裏面，參觀者亦可以睇埋漢墓旁邊嘅展覽館，除咗展出從漢墓出土嘅陶器同青銅器之外，重設有「李鄭屋漢墓」同「華南漢文化」兩個展覽，介紹漢墓嘅地理環境、墓室結構同發現經過，以及漢朝時期嘅嶺南文化。