香港海防博物館

  提示：呢篇文講嘅唔係香港海事博物館。

香港海防博物館係香港歷史博物館嘅分館之一，由康樂及文化事務署管理，位於香港筲箕灣東喜道，全館面積大概34,200平方米，係由具有百年歷史嘅舊鯉魚門炮台修建而成。

香港海防博物館

歷史

香港海防博物館

皇家炮兵紀念碑，原置於香港墳場

添馬艦嘅船錨

鯉魚門炮台喺1887年起好，炮台主要由堡壘、士兵營房、彈藥庫、炮彈裝配室同煤倉等組成。堡壘中央起有露天廣場，畀士兵集散之用。堡壘裏面配備兩門6吋後裝「隱沒式」大炮，四周並建有壕溝。英軍另外响堡壘附近修築多座炮台，包括反向炮台、中央炮台、西炮台同渡口炮台，依山勢由東至西分佈喺岬角上。各炮射程不一，可完全覆蓋成個鯉魚門水道。1890年，英軍更喺岬角海邊起咗布倫南魚雷發射站，係當時世界上最具威力水下武器嘅要塞。

但係，响隨後嘅卅幾年間，香港並未受到攻擊，鯉魚門嘅海防武器一直無用武之地。到咗1930年代，由於武器技術嘅改進同埋其他新炮台相繼落成，鯉魚門炮台响香港海防上嘅重要性逐漸減退。

1941年12月8號，日軍開始進攻香港。喺新界同九龍淪陷後，守軍立即加強鯉魚門嘅防禦力，防止日軍從魔鬼山經鯉魚門渡過維多利亞港。守軍曾經多次擊退日軍嘅突襲，但佢哋最終亦被打敗咗，要塞喺12月19號被日軍佔領。香港重光後，呢個要塞已經唔再係戰略要點，而成為咗英軍嘅操練場。直至1987年，鑑於東區走廊第三期工程喺1986年8月開展，呢處嘅軍事設施正式停用。

前市政局鑑於鯉魚門炮台嘅歷史價值同建築特色，喺1993年決定將佢修復，並改建成一間以香港海防歷史為主題嘅博物館。成項計劃耗資約3億港元，由建築署設計同興建，佢嘅建築設計曾經喺2000年榮獲香港建築師學會周年大獎 – 銀等獎，同埋綠化都市顯才華銀等獎 – 綠化效果。香港海防博物館喺2000年7月25號正式開放畀市民參觀，同年8月31號正式舉行開幕禮，為鯉魚門炮台嘅歷史揭開咗新嘅一頁。2018年9月16號超強颱風山竹吹襲香港，吹冧白色天幕，康文署順手提早本來喺2019年上半年進行嘅翻新工程，預計2021年就重新開返。

設施

香港海防博物館主要分為三個區域，接待區、堡壘同埋古蹟徑，從有接近100年歷史嘅鯉魚門炮台改裝而成。博物館嘅歷史建築有一個好大嘅露天廣場，獨一無二嘅建築設計， 再加上其他原始嘅建築物料，為遊客提供一種舒適同埋古色古香嘅感覺。堡壘被改裝做永久展覽走廊，包括明朝、清朝、前殖民地時期、日治時期、後殖民地時期同回歸後嘅香港防衞歷史。

香港海防博物館展出400幾件藏品全部都同香港嘅海防歷史有關，包括：槍械、大砲、手提武器、軍服同紡織品等。藏品全部屬於香港歷史博物館，另外又有超過20件珍貴文物係從中國國內同香港文博單位借出嘅。

建築

1. 堡壘：喺1887年興建，係鯉魚門要塞嘅核心地點。
2. 中央炮台：喺1887年建成，展覽嘅大炮闊7呎、射程達3,600米。
3. 西炮台：喺1887年建成，展覽兩支喺金鐘發掘出來嘅闊9呎嘅大炮、射程達5,400米。
4. 布倫南魚雷發射站：喺1892年同1894年分別建成，係英軍喺海外佔領地嘅最後一次起好嘅建築。
5. 鯉魚門渡口炮台：喺1892年興建，呢座炮台係用嚟防止快艇、魚雷嘅突襲。

開放時間

• 星期一至星期三、星期五至星期日：上晝10:00至下晝5:00
• 逢星期四、農曆年初一同年初二休館

入場費

2016年8月1號開始常設展覽免費入場。之前除咗禮拜三免費之外，其他日子入場嘅話大人收10蚊，細路、老人家、學生同埋傷殘人士只係要畀5蚊。

公共交通

• 港鐵筲箕灣站B2出口沿指示牌步行15分鐘。
• 城巴85號，由小西灣往寶馬山。

博物館停車場

博物館設有私家車停車場，由上晝10:00至下晝5:00開放（逢星期四、農曆新年年初一同年初二除外）。每位參觀者可免費停車3個鐘。

出面網頁

• 香港海防博物館
• 香港海防博物館相片
• 香港航空青年團儀仗中隊在海防博物館的步操表演