歪焚

  想搵程式語言嘅話，請睇Wyvern (程式語言)。

歪焚（粵拼：waai1 fan4），又有叫雙足龍，係歐洲嘅一種傳說生物，尤其常見於 1700 年後不列顛群島嘅民間傳說同埋紋章。歪焚個樣望落好似龍，不過歪焚得兩隻腳同兩隻翼，唔似得龍噉傳統上有四隻腳同兩隻翼。

呢座雕像描繪嘅係一隻想像中嘅歪焚。

响現代嘅奇幻故仔當中，歪焚幾常見，不過成日都畀人描繪成係「同龍比起嚟低一等」噉嘅—虛構作品入面嘅歪焚往往冇龍咁大隻，法力冇咁強，而且智能亦冇咁高。

嗌法

歪焚响英文入面個名叫 wyvern（又有串做 wivern），英式讀音係 /waɪvən/ 。

呢個音好接近粵拼：waai1 fan4，用呢個粵音嚟假借漢字嘅話就形成歪焚。

主要特性

睇埋：西洋龍

典型嘅歪焚會

• 似大隻、凶惡嘅爬蟲類；
• 有兩隻翼同兩隻腳，有陣時會將兩隻翼當做前肢噉喺地面爬嚟爬去；
• 通常冇乜智能可言，唔似得龍噉成日被描繪成有智能同識施展魔法；
• 好多時有毒，而事實係歪焚喺中古英文入面個名 wyver 據講係衍生自拉丁文 vīpera（毒蛇噉解）嘅；

等等。

呢塊旗上面有隻黃色嘅歪焚。 呢塊旗上面有隻黃色嘅歪焚。

媒體作品

睇埋：奇幻

歪焚喺現代嘅奇幻作品當中成日出現，例如

• 《龍與地下城》（D&D）：有用歪焚做其中一種怪獸；呢隻遊戲裏面啲歪焚係一種中級嘅怪獸，「唔係真正嘅龍」而且唔似得龍噉識由個口度噴火或者第啲噴第啲嘢；D&D 入面嗰啲歪焚仲有一條條好似蠍子噉有毒刺嘅尾。
• 《魔法風雲會》（MtG）：MtG 呢隻集換式咭遊戲有用到 drake 做魔獸嘅一類—MtG 入面嗰啲 drake 外形上同典型嘅歪焚一樣咁滯，只不過係個名唔同咗噉解。
• 《最終幻想系列》：呢個電子 RPG 系列不溜都有用開歪焚做常見嘅遊戲敵人，而《最終幻想 XVI》嘅主角做奴隸兵期間個外號就係叫做歪焚嘅。
• 《魔獸爭霸系列》
• 《魔物獵人系列》

呀噉。

呢個場景嘅背景度有隻歪焚（右邊黃橙噉色嗰隻）。嗰隻歪焚算係幾典型嘅廿一世紀奇幻歪焚。

睇埋

• 奇幻橋段

拎

• 「我哋啲歪焚唔同㗎」 （英文），TV Tropes 講歪焚呢條橋段。