燒味
燒味（粵音：siu1 mei2）係廣東菜入面嘅燒嘢食，酒樓同中式快餐都有得賣，通常會同飯、米粉、河粉或者麵一齊食。
中國大陸同台灣唔少人以為「燒臘」即係「燒味」，但其實有分別，因為香港燒臘舖除咗一年四季賣燒味，秋冬兩季亦都賣埋臘味，所以先至叫「燒臘」。
主要燒味
編輯
叉燒
編輯叉燒係中國廣東燒味嘅一種，將豬肉用叉插住放喺火上燒熟而成，所以叫做叉燒。燒叉燒嗰陣會喺表面塗紅色嘅叉燒醬，所以叉燒係紅色嘅。叉燒醬嘅其他主要材料仲有生抽、蒜蓉、麥芽糖、南乳、五香粉、酒等。好嘅叉燒應該肉質軟嫩多汁、色澤鮮明、香味四溢。叉燒通常揀豬頸肉（豬肩）嚟整，當中又以肥、瘦肉均衡為上佳，叫做「半肥瘦」。用叉燒整嘅其他菜式包括：叉燒飯、叉燒包、叉燒酥等等。
品種：
- 蜜汁叉燒
- 脆皮叉燒
燒乳豬
編輯燒乳豬（又叫做燒乳豬）係傳統食品嘅一種。整法係將兩到六個星期大，仲未斷奶嘅乳豬宰殺之後，用爐火燒烤而成。世界唔同嘅飲食文化都有燒乳豬呢種菜式。中國喺西周時相信已經有食用燒豬。嗰陣時八珍之一嘅「炮豚」相信就係指燒豬。喺西方，古羅馬嘅傳統菜譜中都有燒乳豬一項。而家嘅中國菜中以粵菜嘅燒乳豬最廣為流傳；而喺西方國家中，葡萄牙同西班牙都以燒乳豬為特色菜。
主要菜式：
- 乳豬拼盤
燒肉
編輯燒豬係廣東傳統食品嘅一種。整法同另一種廣東燒味燒乳豬基本一樣，唔同嘅係用已經大咗嘅豬，而唔係乳豬嚟燒烤。燒豬以排骨部最為肥美好食。平時喺廣東燒味中嘅燒肉，即係燒豬嘅排骨部分，又叫做燒腩，如果用嚟再煮過就叫做火腩（例如「冬瓜炆火腩」）。燒豬嘅其他多骨部分好似頭、手腳等可以用嚟煲湯或者煲粥等。
燒肉以皮脆肉嫩為上品。燒豬可以重十到二十公斤，燒肉無論係脂肪定係肉都比較多同厚。而燒乳豬一般只重五到六公斤，除咗一層脆皮之外，得好少嘅脂肪同肉，而且骨頭軟可以食。燒乳豬每斤嘅價錢都比燒肉貴好多；大多數賣燒味嘅鋪頭平時都會有燒肉賣，但乳豬就唔一定成日有得賣，通常要預早訂。
燒鴨同燒鵝
編輯燒鴨係燒味嘅一種，係將塞滿調味料嘅鴨，吊入炭爐裡面用木炭高溫燒烤出嚟嘅菜式，以皮脆有光澤，皮汁多而唔帶腥味為上品，通常配埋醬汁食用。燒鴨嘅做法同燒鵝大致相同，但肉質同份量就唔及燒鵝。不過因為燒鴨成本較低，所以成為咗燒鵝嘅代替品。
燒鵝係燒味嘅一種，係將塞滿調味料嘅鵝，吊入炭爐裡面用木炭高溫燒烤出嚟嘅菜式，以皮脆有光澤，皮汁多而唔帶腥味為上品，通常配埋甜酸醬汁食用。香港嘅燒鵝喺整法上冇咩分別，但因為成本等原因，喺商品說明條例生效之前，有啲香港食肆嘅燒鵝其實係用鴨代替鵝，但仲係叫做燒鵝，而家將燒鴨叫做燒鵝就會觸犯商品說明條例，可以俾香港海關檢控。 香港以燒鵝馳名嘅食肆，包括中環鏞記同新界深井一帶好多間燒鵝酒家。
