物件生成

物件生成mat6 gin2 sang1 sing4（英文：spawning）係電子遊戲上嘅一個用語，指個遊戲程式喺虛擬世界嘅空間裏面「產生一嚿物件」－可以係角色、道具或者 NPC 呀噉－嘅過程。

呢個虛擬世界入面有好多嚿物件－檯、櫈同埋檯上嘅紅酒樽... 呀噉；遊戲程式要响遊戲開始嗰陣 spawn 呢啲物件出嚟。

廿一世紀初嘅電子遊戲廣泛噉採用物件導向編程（OOP）嘅技巧：遊戲程式會將遊戲世界當做由好多嚿物件（object）組成，每嚿物件都有一拃特性，例如响一隻射擊遊戲裏面「玩家角色」呢嚿物件會有生命值同埋「手上揸住啲咩武器」噉嘅一拃特性；呢啲咁多唔同物件要喺遊戲世界當中郁動以及互動，令到遊戲得以進行；喺遊戲開始嗰陣，遊戲程式通常就要將呢啲物件產生喺遊戲世界嘅特定位置度。

因為物件生成咁常用，主流遊戲引擎嘅手稿語言（簡化講，係專俾人喺遊戲引擎度寫程式嘅語言）都索性整埋專化嘅陳述式嚟做呢樣工作，例如 Unity C# 嘅 Instantiate 就相當出名。

主要功能

睇埋：物件導向編程

• 生成（spawn）：物件生成嘅基本；生成通常嘅做法係，遊戲程式寫成指明件物件屬咩類別，然後指定嚿物件要出現喺遊戲世界嘅邊個位置，跟住嚿物件就會按照佢內部嗰啲程式碼嚟行事；例如係喺 Unity C# 手稿裏面會有以下噉嘅碼：

  using UnityEngine;
  using System.Collections;
  
  public class ExampleClass : MonoBehaviour
  {
      public Transform prefab; // 俾用家指定嚿物件嘅位置、旋轉同要縮放幾多倍。
      void Start() // 開始嗰陣...
      {
          for (int i = 0; i < 10; i++) // 重複以下工作 10 次...
          {
              Instantiate(prefab, new Vector3(i * 2.0F, 0, 0), Quaternion.identity); // 指定位置同旋轉，產生嚿物件。
          }
      }
  }
  

• 反生成（despawn）：指將一件物件由個遊戲世界入面除走，例如一個角色或者敵人生命值變咗 0，佢就會死亡，而喺呢個時候個遊戲程式就要將佢剷走；噉做係因為如果一個遊戲世界入面物件數量多得滯，會搞到隻遊戲窒。喺 Unity C# 手稿裏面有以下噉嘅碼：

  using UnityEngine;
  
  public class ScriptExample : MonoBehaviour
  {
      void DestroyGameObject()
      {
          Destroy(gameObject); // 將嚿 gameObject 剷走佢。
      }
  }
  

• 重新生成（respawn）：指一件物件反生成之後再生成多一次；例如喺好多遊戲當中，玩家角色俾敵人打中死亡之後唔會即刻 GAME OVER，而係玩家會少咗條命，跟住個玩家角色會喺某個地點再生成，要一路去到玩家角色死兼且玩家啲命冇嗮嗰時先會 GAME OVER 。
• 生成地點（spawn point）：指遊戲世界入面一個指定用嚟俾某啲嘢重新生成嘅地點；例如係好多 PvP 射擊遊戲嘅死亡競賽入面，玩家角色死咗會响若干秒之後重新生成，等玩家有得繼續參與對局，整嚟俾重生生成發生嘅地點就係生成地點；喺實際應用上，生成地點通常會係遊戲世界入面一嚿隱形嘅物件。睇埋生成地點露營。

睇埋

• 物件
• 虛擬世界
• 遊戲物理
• 布公仔物理

拎

• Object.Instantiate. Unity Manual.
• Object.Destroy. Unity Manual.