人類行為

人類行為（英文：human behaviour）係指人類嘅行為。心理學有重點研究人類行為，而動物行為學都有對呢方面著墨。

消費行為

内文：消費行為

睇埋：市場學同行為經濟學

消費者行為係一種人類先會展現嘅行為，定義係指：

「

原版英文："... all activities associated with the purchase, use and disposal of goods and services, including the consumer's emotional, mental and behavioural responses that precede or follow these activities." 粵文翻譯：（消費者行為係）... 一切同貨品同服務嘅購買、使用同掉棄有關聯嘅活動，包括消費者喺呢啲活動前或後嘅情緒、心靈同埋行為反應。

」

消費者行為建基於消費（consumption）嘅概念。喺嚴格嘅經濟學上，消費係指「運用手上資源獲取即時效益嘅舉動」：想像家陣有個人攞住啲錢（手上資源），佢行入一間麪包鋪度畀錢買咗件芝士蛋糕，件芝士蛋糕佢可以即刻食落肚滿足食慾（即時效益）－噉嘅行為就係所謂嘅消費；消費嘅相對係投資－投資係「消耗手上嘅資源，以求喺將來得到更多嘅資源」嘅舉動，例如想像有個人使錢（消耗手上資源）買股票，預隻股票第時會升值，令佢第時可以賣走啲股票圖利（將來利益）但冇話滿足到啲乜即時性質嘅慾望。

2017 年香港一條好多舖頭嘅街；有好多消費者喺度行街買嘢－展現緊消費行為。

消費嘅過程會涉及好多認知同情緒變化，例如：

• 買嘢嘅舉動本質上就起碼會涉及決策－例如想像個人有幾樣嘢想買，但唔夠錢買嗮啲嘢，噉佢就有必要喺腦海入面衡量每樣嘢對佢幾有價值，揀對佢最重要嗰樣嚟買；
• 「將買咗嘅嘢攞去用」好多時會或多或少噉引起情緒變化－例如想像個人買咗件芝士蛋糕，佢食件蛋糕嗰陣正路會得到快感，呢股快感會受咩因素影響呢？
• 「買返嚟嘅嘢用完，要攞去抌」嘅過程又會涉及某啲行為－例如想像個人食完件芝士蛋糕要抌咗啲包裝紙佢，佢有幾大機率會肯規規矩矩噉將啲包裝紙抌落垃圾桶呢？有乜因素會影響呢個機率呢？

消費者心理學（consumer psychology）就係專研究消費者行為嘅學問。呢門學問結合營銷學同心理學，目的係想運用心理學知識理解消費者行為，仲會想靠研究所得嘅知識幫企業手做營銷上嘅決策，甚至幫政府手制定政策，左右人嘅消費行為。

健康行為

内文：健康行為

健康心理學係心理學一門，專門將心理學上嘅概念用落醫療健康相關工作上；健康心理學其中一個最多人關注嘅課題，就係要點樣鼓勵健康行為，即係－

「

點樣改變啲人嘅行為，令佢哋做多啲對健康有利嘅行為（例如食蔬菜同生果），同令佢哋做少啲對健康有害嘅行為（例如食煙）呢？

」

多種對健康有重大影響嘅行為
食蔬菜同生果 食蔬菜同生果  食煙 食煙  運動 運動

文獻

• Davis, R., Campbell, R., Hildon, Z., Hobbs, L., & Michie, S. (2015). Theories of behaviour and behaviour change across the social and behavioural sciences: a scoping review. Health psychology review, 9(3), 323-344.