米芝蓮指南

 米芝蓮指南（粵拼：mai5 zi1 lin4 zi2 naam4） （法文：Guide Michelin，音標：[ɡid miʃ.lɛ̃]）係一本飲食指南，教人去邊處有好嘢食嘅餐廳。米芝蓮以前由賣車軚出身，收尾兼埋出車主指南書仔，教人有關車輛嘅常識，好似架車壞咗點樣自己整，去到世界各地邊度有拖車公司，搵嘢食邊度有食肆咁。

米芝蓮指南（紅皮書）

收尾原來佢本飲食指南好多人當咗係世界權威，榜上有名嘅餐廳老闆會好開心，重有個落榜嘅廚師傷心到要自殺。

粵地區各版本

港澳版

港澳版2009年開始出，係大中華地區入面頭一笪地方出。

榜上有名嘅香港食肆包括國際金融中心利苑酒家、中環鏞記酒家、灣仔福臨門、銅鑼灣富臨咁。

書上面除咗有星級食府，重有標誌有一碗麵嘅粥粉麵飯鋪頭，好似中環麥奀雲吞麵世家、沾仔記咁，都嚮書上面搵到。

廣州版

廣州版喺2018年6月尾出街，係繼港澳、上海、臺北後嘅第四個大中華地方指南。米芝蓮指南發佈前嘅宣傳等係由廣州市旅遊局同米芝蓮公司一起搞，政府預算出近五十萬請米芝蓮整廣州旅遊定製版嘅廣州米芝蓮指南，包埋搞宣傳等 。

首版嘅廣州米芝蓮指南未有使用粵語譯名「米芝蓮」，而係照用北話譯名「米其林」。另外，佢初頭嘅宣傳project句口號係「米到羊城」，粵語諧音就係「咪到羊城」（唔好到廣州），英文名就照搬北話拼音而唔用返Canton，一出街陣畀唔少網民批評，畀傳媒稱之為「公關災難」。* 睇埋：廣州地名

廣州版（2018年）指南有三部分，一星餐廳8間，冇二同三星餐廳，炳勝、惠食佳、玉堂春暖、利苑呢啲登到榜；第二部分係必比登推薦，係啲平價餐廳，諸如天都里、堅記、創發餐廳、同記、老西關瀨粉、朱仔記、向羣飯店、南園酒家、達揚燉品；第三部分係餐盤獎嘅推薦餐廳，如泮溪酒家、北園酒家、Ebony、廣州酒家、吳財記、源記腸粉。

粵菜專版

米芝蓮11月12號喺廣州白天鵝賓館舉行典禮，推出咗全球第一本米芝蓮粵菜指南，覆蓋亞歐、美國及義大利等15個國家，共收錄咗291家優質餐廳，其中78間係米芝蓮星級餐廳（亞洲69家，歐洲8家，美國1家）、62間必比登推介餐廳，同埋151間米芝蓮餐盤餐廳。呢本指南係中英文對照出版，中文係只有簡體兼且未有使用粵語譯名「米芝蓮」。

睇埋

• 米豬連

拎

• Michelin Guide
• ViaMichelin
• Michelin Three Star Restaurants
• 美食聖經《米其林指南》
• 明報，2008年12月8日：《米芝蓮指南 香港 澳門 2009》