練功券

  呢篇文章講嘅係銀行使用嘅一種工具。想搵網上遊戲嘅道具，請睇「魔力寶貝」。

練功券，全名銀行練功專用券或者出納點鈔（數錢）專用紙，又叫數錢券，係畀中國大陸嘅銀行人員練數銀紙技能嗰時當真銀紙用嘅道具。中國大陸以外嘅地方並無類似嘅嘢，皆因多數會直接用真銀紙嚟練數銀紙。

概述

中華人民共和國成立時，已存在金融機關工作人員用廢鈔練數錢嘅情況。1989年起開始印製專用券，佢哋紙質、紙幅同真鈔基本相同，多數喺上海、石家莊、西安、成都、保定等印鈔廠印製，有啲甚至有埋水印等防偽措施，亦經常隨新版紙幣發行而出新。練功券一般分三類：各大金融機構所印嘅，有明顯標籤，通稱「通用券」；各金融機構嘅省（市）一級分支所印，有分支機構標籤嘅「地方券」；印刷簡單，只標明「點錢專用紙」、「練功專用」等字樣嘅「行業券」。

因為佢獨特地位同多樣性（除人民幣外亦有外幣版本）、存量有限又價格適中，成為一啲愛好者嘅收藏品。

犯罪用途

中國大陸向澳洲、加拿大、香港等地輸出印有簡體中文「練功券」字樣嘅假幣。近期，商家不時發現「強國大媽」用佢，懷疑有計劃嘅假鈔行騙。而家呢啲「練功券」喺淘寶網有售，但如受害者所指，偽鈔造工差，只喺受害人冇心機同燈光唔夠嘅情況，先可能俾人呃。事實上，歐美西方多國同香港嘅銀行都冇用過「練功券」。喺香港，呢啲仿真銀紙，包括道具在內，未申請許可權而藏有即屬犯法 。