耶加婆婆

耶加婆婆je4 gaa1 po4 po2（俄文：Баба-яга，羅馬字轉寫 Baba-jaga；英文：Baba Yaga），又可以音譯做芭芭雅嘎gaa4或者罷罷吔jaa1嘎，係一個好出名嘅角色，成日出現喺俄羅斯同埋其他斯拉夫民族嘅童話同民間傳說入面。喺形象上，耶加婆婆顧名思義係一位阿婆，會坐住碌舂zung1臼四圍飛，專喺森林入面捉細蚊仔嚟食。

呢幅圖畫描繪想像中嘅耶加婆婆形象。

呢幅圖畫都係描繪想像中嘅耶加婆婆。

有人整咗個模型，描繪想像中嘅耶加婆婆雞腳屋仔。

响廿一世紀初，耶加婆婆幾出名，有唔少影視娛樂作品都有由耶加婆婆嘅故仔度取材。

嗌法

好多斯拉夫語言裏面都有 Baba Yaga 呢隻字詞。响廿一世紀初嘅俄羅斯話同波蘭話當中，Baba 係一隻帶有貶義嘅字詞，係指年老、污糟、蠢嘅女人，譯做粵語可以大致譯做死阿婆。隻字有陣時亦會畀人攞嚟指動物甚至自然現象。

有關 Yaga 具體係咩意思，廿一世紀初嘅學者仲未有咩共識，可能係啲意思不明嘅古字。

形象

睇埋：巫婆同仙子

喺外形上，耶加婆婆通常係生得好醜樣嘅巫婆，通常會响森林出沒。佢好興坐住個巨型嘅舂臼飛，會攞住掃把敲打舂臼嚟改變飛行嘅速度同方向。佢坐住嗰個舂臼飛起上嚟可以快得好交關，畀耶加婆婆追嘅人跑得幾快都走唔甩。

有啲故事話，耶加婆婆查實唔係單一一個個體，而係三姐妹，三個嘅名都係叫耶加婆婆。

相傳耶加婆婆住喺一間怪屋仔裏面，間屋仔有好似雞噉嘅腳，仲識行。間屋嘅窗口對住森林，門口就對住牆。一旦耶加婆婆感覺到有細路喺森林蕩失路，就會叫間屋企轉向，打開個窗，準備捉細路。亦都有啲傳說話，耶加婆婆嘅屋仔會有用人骨造嘅圍欄，經過嘅人可以由人骨嘅數量睇得出耶加婆婆殺咗幾多人。

耶加婆婆嘅故仔成日會講耶加婆婆捉人，通常係話佢食人肉，尤其中意食細路。亦有好多故仔話耶加婆婆捉到人唔會即刻食，而係會要受害者幫佢做吓家務先。耶加婆婆通常會作出一啲無理要求，例如要求受害者喺半個鐘頭內打掃晒成間農舍，或者糝sam2啲麥粒落地執返起，再要求受害者將啲麥粒上面嘅塵拍乾淨... 呀噉。受害人實係做唔嚟，耶加婆婆然後就會發惡，食咗受害者落肚。亦有啲故仔講到，受害者真係達成到無理要求，結果耶加婆婆竟然放佢走，仲送啲法寶畀佢。

值得一提嘅係，耶加婆婆又唔見得完全係邪惡嘅：某啲故仔講到耶加婆婆識得好多普通人唔識嘅嘢（或者正常人唔應該知嘅嘢），所以故仔講普通人去搵耶加婆婆幫手，而耶加婆婆又真係肯幫—縱使搵耶加婆婆幫手通常都有些少危險，例如耶加婆婆可能會想乘機食咗求助者。

影響

有唔少漫畫同視像遊戲等嘅創作品，都有由耶加婆婆相關嘅故仔嗰度取材。

美國 DC 奇幻漫畫《Fables》個故仔，講好似白雪公主同大壞狼等嘅童話寓言角色被驅逐出仙境，焗住要喺平凡人嘅世界生活。耶加婆婆有喺呢個故仔入面出現，而且仲係其中一個重要嘅奸角。

睇埋

• 《糖果屋》入面嗰個巫婆
• Boogeyman
• 瘦長男
• 恐怖谷

拎

• 文學 / 耶加婆婆 （英文），電視橋段網都有講耶加婆婆。
• 耶加婆婆 （英文），一個講耶加婆婆嘅短篇故仔。
• 耶加婆婆：出名巫婆嘅遠古起源，Monstrum （英文），呢段 YouTube 片講耶加婆婆嘅傳說。