色名

色名（粵拼：sik1 meng2）係指一隻語言用咩字詞嚟指唔同嘅顏色。對於色名嘅思考，可以係純物理性質嘅，即係齋靠考慮啲光嘅頻率（可以睇吓可見光嘅概念）嚟同唔同嘅顏色改名。不過另一方面，又有唔少語言學研究者想剖析自然語言點樣用字詞嚟指顏色。

唔同色嘅名（原圖係英文）－圖入面每隻色都有隻字詞對應。

事實表明，啲人講嘢嗰陣嘅用字，並唔完美噉反映顏色嘅客觀特質；例如粉紅同紅之間嘅差異，查實等同淺綠同深綠之間嘅，但好多語言都會有隻字特指粉紅，例如英文入面嘅「pink」或者日本話入面嘅「pinku（片假名：ピンク）」噉，而唔淨只係將粉紅稱之為「淺紅」就算數。佢哋好似將粉紅當正咗係隻「獨立嘅顏色」噉。

主要階段

有唔少語言學家都研究過色名。世界上，有成7,000幾種語言，當中有好多語言嘅用家群都係未經過工業化嘅過程，或者係好與世隔絕（例子可以睇吓新畿內亞），未點樣接觸過現代英文等嘅主流語言。語言學家請咗以呢啲噉嘅語言做母語嘅人返實驗室，畀佢哋睇一大拃顏色，再叫佢哋由母語度搵隻字嚟描述佢。同時，啲語言學家又搵咗啲用英文、西班牙話等主流語言做母語嘅人返嚟，做同樣嘅嘢。

佢哋發現：

• 唔同語言响「點分辨顏色」呢點上有唔少差異，例如粵文會有藍laam4同綠luk6嘅分野，但有啲語言會將藍當做綠嘅一種；
• 顏色之間有所謂嘅「等級差異」，即係話顏色可以分成「基礎」同「冇咁基礎」：想像家陣設 X 同 Y 做兩隻唔同嘅色，「X 基礎過 Y」意思係指如果一隻語言有隻字嚟特指 Y，噉佢好大機會都會有隻字嚟指 X，而亦有好多語言係「有字指 X 但冇字指 Y」嘅。

睇咗一大拃語言啲色名之後，語言學家就劃出咗以下嘅「顏色等級」：

等級 1

内文：白色同黑色

喺一隻語言當中最先出現嘅，會係指光（白色）同埋指暗（黑色）嘅字。即係話喺呢個階段，隻語言得兩隻字嚟指顏色：

• 光（白；包埋黃等）
• 暗（黑；包埋藍、綠等）

喺呢個階段，啲人會傾向於將淺同暖嘅色當做光（白），而將深同凍嘅色當做暗（黑）。

等級 2

内文：紅色

啲人開始唔係齋靠光暗嚟分辨顏色。喺呢個時候，佢哋通常會整隻字嚟指紅色。即係隻語言會有：

• 光（白）
• 暗（黑）
• 紅（通常會撥埋黃、橙等入嚟）

喺呢個階段，藍仲係傾向會畀人當成暗（黑）。

等級 3~4

内文：黃色同綠色

睇埋：語言點分藍綠

喺等級3~4，啲人繼續靠光暗以外嘅條件嚟分辨更多唔同嘅色。喺呢個時候，佢哋通常會開始分黃色同綠色，當中黃色似乎有少少傾向會出現先。即係隻語言會有：

• 光（白）
• 暗（黑；有時會包埋藍）
• 紅
• 黃
• 綠（有時會包埋藍）

五大隻字嚟指唔同嘅顏色。值得留意嘅係，有好多語言都傾向將藍當做綠嘅一種。例如青呢隻漢字就出晒名定義含糊：青有時畀人用嚟指綠綠哋噉嘅色，例如粵文詞彙青咇咇ceng1 bi1 bi1就係噉；又例如日本話入面嘅漢字青（日羅：ao）可以指藍又可以指綠，搞到唔少日本人索性由英文嗰度借詞，用 guriin（片假名：グリーン，嚟自英文 green）嚟特指綠色。

等級 5 或以上

以下嘅字會依次序先後噉出現（或者話從其他顏色脫離出嚟）：

• 藍色
• 啡色
• 紫色
• 橙色
• 灰色

粵語特色

粵語有樣嘢幾出名，就係好興用 YXX 噉嘅字詞嚟形容顏色，例如：

漢字	粵拼
黃黚黚	wong4 gam4 gam4
紅卜卜	hung4 bok1 bok1
紅噹噹	hung4 dong1 dong1/hung4 dong1 dong6
青咇咇	ceng1 bi1 bi1
白雪雪	baak6 syut1 syut1
白晒晒	baak6 saai4 saai4
烏卒卒	wu1 zeot1 zeot1
黑鼆鼆	haak1 mang1 mang1

睇埋

• Lexicon
• 語言演變
• 語言相對論
• 彩色視覺
• 色彩理論

文獻

• Alexander, Caroline (Summer 2013). "A Winelike Sea". Lapham's Quarterly. VI (3)，講到古希臘詩人荷馬喺佢嘅名作《伊利亞德》同《奧德修記》當中，多次將海描述做「葡萄酒噉嘅色」，引起咗學者思考古希臘人到底係點樣分顏色嘅。