被視為受到中華人民共和國政府影響嘅非本地媒體一覽

有部份人(例如台灣泛綠陣營同其他反共人士)認為，中國政府會透過一啲外國傳媒進行對外宣傳，甚至發放有利於自己嘅假新聞。呢個一覽表列出一啲被視為受到中國政府影響嘅非本地媒體。不過，呢啲指控往往具有一定爭議性，有關媒體或者中國政府好多時都會否認，其他評論嘅人亦有唔同意見。

國家/地區	海外媒體名	相關事件同指控
新加坡	《聯合早報》	民進黨立委蔡易餘曾經表示經過對《聯合早報》長久嘅觀察，形容佢係一個親中派嘅媒體，亦係中國大外宣嘅一部分。另外，喺張高麗涉嫌性侵彭帥事件入面，聯合早報亦有接受中國政府「廈門市委宣傳部」落嘅廣告，製作一份彭帥聲稱自己冇被性侵嘅假新聞。
馬來西亞	亞洲紅點傳媒	亞洲紅點傳媒被指係北京政府對馬來西亞華人進行統戰嘅媒體之一，但亞洲紅點否認，指自身資金來源唔係「紅色資本」。
台灣	中天新聞台	中天新聞台被唔少人視為臺灣親中共派，喺2019年7月就被指接受中國國務院台灣事務辦公室指示採編新聞。喺2020年11月，因為違規紀錄嚴重同埋內部自律機制失靈、台灣國家通訊傳播委員會七名委員全數通過對中天新聞台嘅否決案。不過，佢哋之後仍然維持網上嘅新聞節目廣播。
台灣	《中國時報》	《中國時報》被唔少人視為親中，喺2019年7月就被指接受中國國務院台灣事務辦公室指示採編新聞。
澳洲	《澳洲新報》	澳洲新報被指喺2012-13年之間開始，疑似受到中共嘅施壓，拒絕刊登一年一度嘅六四紀念活動宣傳廣告。
澳洲	《今日悉尼》、《今日墨爾本》、《今日昆士蘭》、《今日阿德》、《今日珀斯》	佢哋都係今日傳媒集團旗下，同中國共產黨有頗為密切嘅關係，例如喺2017年1月，中國駐悉尼總領事顧小傑，就曾經訪問今日傳媒集團，又大讚集團自創辦以來始終堅持客觀公正嘅輿論導向。另外，前中共外交官陳用林喺2019年4月喺一個研討會發言嘅時候，亦提到今日傳媒集團喺好多議題上都極力咁同中共保持一致。
香港	《亞洲週刊》	喺香港逃犯條例爭議期間，佢哋將被指濫權嘅香港警察形容做香港嘅「定海神針」、「守護天使」、「最被仰賴、最被敬重的群體」，又曾經形容台灣總統蔡英文係「民選獨裁」，引起爭議。
香港	《點新聞》	親中派香港大公文匯傳媒集團旗下嘅網上媒體 ，曾經被部分網民指多次製造同散播針對假新聞，同埋多次盜取其他媒體採訪材料被譴責。
香港	無綫電視	内文：無綫新聞對香港非建制派嘅唔公平對待、反送中運動期間對無線電視嘅批評同關於東張西望嘅爭議 無綫新聞一般被視為親中派媒體，報導嘅觀點偏向北京或香港政府官方嘅聲音。喺處理一啲同香港非建制派有關嘅新聞時，無綫新聞有時會被部分嘅人批評，唔公平咁對待非建制派，反而會畀親中派充足嘅時間解釋佢哋嘅觀點。加上部分無綫新聞嘅高層同親中派嘅關係，喺社會上有一定爭議。另外，無綫另一並非由新聞部製作，但標榜娛樂同時事資訊，同時為無綫電視唔同業務做宣傳嘅節目《東張西望》，團隊入面好多人，都並未經歷過正規新聞學嘅訓練，除咗帶有唔少商業宣傳。亦涉及意盜用他人短片、硬銷政府政策同決定、對社會問題抱有偏頗預設立場嘅爭議、發佈假新聞等。