鑊

鑊（wok）係種源於中國嘅廚具，有大有細；特徵係開口大，鑊底部分係拱起。鑊主要用嚟煎嘢或炒嘢食，但亦都可以蒸，燉，炸；係唐人地方、東亞同東南亞主要煮食架生。

響個鑊度炒緊嘢

傳統嘅鑊底係圓拱形，適合傳統中式嘅煮食爐，而現代嘅鑊同喺歐美賣嘅鑊就適合現代同西方嘅爐頭。

西方人亦都有類似煮食架生，叫煎 pan （烹）（Frying pan），又叫平底鑊。

鍛造

傳統鑊係將一塊一塊嘅生鐵放喺個凹模上面用鎚仔打成，再燒埋個手柄上去就造成。現代大量生產嘅鑊係用機啤出嚟。

由於生鐵鑊嘅表面有穩定嘅碳化層，令調味料唔易黐喺鑊上面。就算生鐵鑊喺保溫性同均勻嘅熱量分佈方面都好過普通碳鋼鑊，但佢哋對熱量吸收嘅反應較慢，熄火之後個鑊重會熱好長時間。

文化

中國北方人叫鑊做鍋，有人考證過鑊同鍋可能同源，因為咼係代表凹入去嘅嘢。不過廣東話講嘅鍋通常唔係鑊型。而閩南話就叫鑊做鼎。

【鑊】呢個字老過【鍋】。因鑊咁常用，有唔少同鑊有關嘅詞，好似：大鑊、孭鑊、黑鑊、補鑊、一鑊嘢。