節奏遊戲
(由音樂遊戲跳轉過嚟)
節奏遊戲（粵拼：zit3 zau3 jau4 hei3；英文：rhythm game / rhythm action）係電子遊戲類型一種，指一啲考玩家節奏感嘅電子遊戲。
定義
編輯喺最廣義上，一隻節奏遊戲做嘅通常係播一啲音樂或者最少有拍子，要求玩家喺適當嘅時間俾適當嘅反應，簡單例子有每吓拍子都要撳一個掣，然後隻遊戲就會按照玩家嘅節奏感－即係能唔能夠喺準確嘅時間點撳掣－嚟評分，並且按玩家嘅得分給予獎勵，例如係玩家要攞到最少若干分先至有得玩下一關，等玩家有意慾盡力提升自己嘅得分；亦都有遊戲會要求玩家能夠俾正確嘅音高輸入，即係例如有個虛擬嘅鍵盤樂器（鋼琴等），玩家唔淨只要喺適當嘅時間點撳掣，仲要係有幾個掣可以撳，要撳啱個掣先至有分。而雖然話節奏遊戲主要考節奏感等同聽覺有關嘅能力，呢啲遊戲正路依然會用視覺嘅方式嚟呈現啲嘢俾玩家睇，例如廿一世紀嘅節奏遊戲多數都會有一條音符通道（note highway）俾玩家望實，每當有個音符通過條音符通道嗰陣，玩家都要撳相應嗰個掣，撳啱先有分。除此之外，唔少節奏遊戲仲會喺畫面嗰度加入啲得意或者有型嘅虛擬角色，要呢啲角色對玩家嘅表現俾反應，例如玩家表現唔好嗰時畫面入面個角色就耍手擰頭，作為遊戲俾玩家嘅一種回輸[1]。
簡史
編輯到咗廿一世紀初，節奏遊戲喺商業上經已取得相當嘅成功，好似《太鼓之達人》就係一隻出名嘅節奏遊戲，喺好多唔同嘅平台上面出過，包括街機、NDS、PlayStation 2、Wii 同埋手機呀噉。除咗商業上嘅成功之外，節奏遊戲仲吸引咗教育界嘅注意，有遊戲設計方面嘅專家喺度諗緊用節奏遊戲做音樂教育嘅一部份[1]。