Portal:香港鐵路運輸/精選文/7

鑽石山站2號月台

鑽石山站（粵拼：zyun3 sek6 saan1 zaam6；英文：Diamond Hill Station）係港鐵觀塘綫同屯馬綫嘅地下鐵站，喺香港黃大仙區鑽石山，係最近大老山隧道嘅鐵路站，同附近嘅荷里活廣場相連。全個站用黑色做主要色調，並用銀色石塊點綴，代表鑽石。

鑽石山本身只係一個石礦場，冇出產過鑽石。「鑽」本身係動詞，而「石」先至係名詞，代表呢度係個石礦場。一般人相信，係港英政府嘅錯譯。所以「鑽石山」英文畀人錯譯做「Diamond Hill」而唔係「Rock Digging Hill」。約定俗成之下，鑽石山站英文名叫做「Diamond Hill Station」。

車站開幕初期，人流一直偏低，返工時間以外人流更冷清。大老山隧道啟用之後，部份沙田區同大埔區嘅公共巴士開始途經此站，人流開始有所增加。當此站上蓋物業星河明居同大型商場荷里活廣場開幕，使用情況已經大大改善。加上屯馬綫喺2020年2月14號通車後，新界東部及北部居民可以用此站轉觀塘綫往返九龍東部，預料本站客流量會進一步上升，並有助分流九龍塘站嘅轉車客流。